مساحة إعلانية
مساحة إعلانية
مش قصدي أحن
ولا قصدي أرمي ف أشواق
عمّاله بتزن
ولا قصدي أغرق أحلامي
ببحور البعد
ومش قصدي الهجر
ولا قصدي أحضّر طيفك حوليّا بشوية شعر
ومش قصدي اخطّف منك ليا شوية عمر
دا أنا كت بناغش ويّا الليل فرماني عليكي
ومكنتش أعرف إنّه الليل مشتاق لعنيكي
حكاويكي عبت منَغْشِتْنا بشوية نور
رغم إنها كانت تاعبة الليل .. وكانت زور
بس أنا صدقت
مش عارف أعيب في ماضيّا
ولا أعيب دلوقت
دلوقتي عرفت إنه بحورك كان كلها بور
كان نفسي تكوني ورود الجنة مش تبقي السور
في بحور بورك أنا كنت زرعت
فـ بطرفة عين في صحاريكي غرقت
وبرمش عيوني بر عنيكي .. لمحت
روحتلك طير
عشمت عطشي يَمْ عينيكي
وطلعتي سراب
فكّرتك غير
فكّرتك هتكوني للوحدة ونيس
مش قادر أصدق
إنْ العين اللي أنا شفتها ضحكي
تجعلني تعيس
مش قادر أصدق
إنْ قُليبك الملكوتي يطلع إبليس
وعمّال أوزع الحب بكل حب وقلبي متكسر
زي اللي بوزع حلاوة بالمجان وعنده السكر
أنا اللي مشيت في طريقك أوطان
ورموشك حوطتني بمليون عسكر
رميت في طريقك كل الطاعة
ورماني أنتِ في طريقي المنكر
ميغركيش عدد عشاقك ”
أنا بيهم ... لأ أكتر..!!“
زرعت إيدينك شهد
ما دوقت منهم غير حنطل..
ونهر هواكي فـ ريقي كان مد
غزلتي حبك ليا بخيوط العنكبوت
ومع أول نسمة البيت أتهد!!
فمش عارف برضو
أعيب فـ ماضيّا ولا أعيب دلوقت
فبطلت أحن..
وبطلت أرمي فـ أشواق عمّاله بتزن
وبطلت أحب..
علمت حبري يشطب
لما ليكي أفكر أكتب
وعروقي حفظت
إنك مش هتخطي عليها تاني خلاص..
وهجرك علمني إنه عليكي لازم أكدب
بس فيه سؤال
هو زن أشواقي مبيوصلكيش؟
هو أنا مبوحشكيش؟!
مساحة إعلانية
مساحة إعلانية
