مساحة إعلانية
مساحة إعلانية
إهداء لروح الإستثنائية هبة دربالة
لو بإيدي
كنت أغير ألف حاجة
لألف حاجة تانية خالص
إبتداء من أنين الورد في الفتارين
و انتهاءا بالصراعات اللي أدت للمجاعة
في بلاد الرصاص الحي فيها
كان بديل القمح
في إيدين الجواعى المؤمنين
إنهم أصحاب قضية
و الحقيقة إنهم أصلا
ضحية حد قاعد فوق
يخبط دول في دول
حد شاف الموت
بضاعة و بنكنوت
لو بإيدي
كنت أقول للموت
يا موت خليك رحيم
بالعيال الخضر
و قلوب الغلابة
اللي مروا عالدنيا عطاشى
و اللي عاشوا ميتين
خلي سهمك ينطلق يم اللئيم
اللي فخخ كل خطوة
في دروب الطيبين
اللي حرم كل غنوة
و اللي مرر كل حلوة
و اللي شال فوق راسه عمة
و حط فوق اللوحة طين
لو بإيدي
كنت أقول للوقت
على مهلك علينا
دا احنا لسه يادوب
بنتهجى الحياة
لسه بنحاول ندور في المتاهة
عن طريقة للنجاة
لسه ما شبعناش حياة
لو كان بإيدي
كنت هاختار لي وطن برا الخريطة
أول فروض العيشة فيه
الحب و الحرية
و الجبن و الخوف و الجمود
يكونوا في عرف القانون أعظم خطية
لو بإيدي
كنت أمنت الشجر
من حشة المناشير
و عملت لخيال المٱتة
جناح كبير
علشان إذا مل الوقوف
يقدر يطير
و يسيب مناب
م القمح للعصافير
لو بإيدي
كنت أشيل فصل الغواية
م الرواية
كنت أسيب كل الأحبة
ياكلوا من كل الشجر
كنت أسامح
في إشتهاءهم للشغف
في إحتياجهم للونس
كنت أهيأ للمحبة
جنة تانية بدون حرس
و لا جلادين
لو بإيدي
كنت أخلي الحب دين
..
مساحة إعلانية
مساحة إعلانية
