مساحة إعلانية
مساحة إعلانية
شعر : محمود الحبكى
ح تعيش كام
بتعمِّر فيها على كد ما بتمد إيديك
وعينيك
وبتطبع فيها برجليك
راح تطلع منها زى ما جيت
من غير ما ح تتزوَّق
أو تعدِل هِندام
تغمِز لك بشمالها
ومالها
وتزغلل قلبك بِجَمَالها
راح تغرق في اليابس
لا ح تطلع ورا
أو ترجع قُدَّام
رغم براحها بتصبح أوضه
وما تسوى جناح لبعوضه
وبرغم الألوان الفاقعه
وآخر موضه
بتتقشَّر وبتصبح خُرده
وكوم لركام وحطام
بتكتِّف فيك بحبالها
ووبالها
ولما بتوقَف نِد قبالها
بتضحك لك
وبترمي الحبل
وتآخده بعشمك
لكن بيكون دا الإعدام
لما ح ترجع تاني تعيش
تلقي مفيش
مهما ح تفتح باب والشيش
تفرّك عينك بتشوف عتمه
تكتم نَفَسَك ثم تنام
دنيا بتكدب
ونصدِّقها
وبنكشفها مع الأيام
مساحة إعلانية
مساحة إعلانية
.jpeg)
