مساحة إعلانية
مساحة إعلانية
أوقات باشتاق لزمان
فتاخدني شوية أحلام
وبترجع بيَّا الأيام
وأشوف تفاصيل مرِّت بيَّا
في الماضي المليان أوهام
..
أكبر تفصيلة ف أحلامي
يوم لمَّا زرعت فْ قلبُه زهور
ورويتها بحب كبير وحنان
كبرِت... كترِت
صَبَحت بستان
وبدال ما يصون الأزهار
وألقى حنانُه..
مطرة بتبلّْ الروح
وتخضَّر غصني المجروح
نَزَع الأحلام..
وحدفها بقوة.. بعييييد خالص
وانا ويَّاهم
شوَّه أيام عمرى بقسوة
وحروفه
كات جارحة وقاسية
..
لملمت الجرح فْ شنطة عمري
وسافرت لوحدي
الخطوة ضعيفة ومنكسرة
بتجرّْ الخطوة من الحسرة
والضهر صبح محني وشايخ
عدّيت... ومشيت
قلت ح اكمِّل
عدَّاني القَطر..
وسابني ف أيامي وحيدة
قصدي... شريدة
...
وساعات
ف ليالي ما عديتهاش
خلِّيت من أرض الله فرشي
ونجوم السما تبقى غطايا
وسحابها لقلبي عملته لحاف
يداريني من الليل المرعب
أصل انا طول عمري
لوحدي باخاف
..
على بَكَرة خوفي وأحلامي
لفلفت خيوط أحزان روحي
وباخاف لا تْكُر
تكشفني عيون تشمت فيَّا
فاتدارى فْ وسط الضلمة
الوحدة
البرد
الخوف
وأقوم الصبح ارسم ضحكة
أتحدى ف قهري وأي ظروف
وما حدِّش عارف
ولا شايف
كَسْرة روحي
إكمن أنا حضني ما لوش شطِّين
مليان بالورد وبالخضرة
وطيور الحب سلام وأمان
وبرغم دا كله
غرسوا الأشوك فِ عيون القلب
بقى مش قلب
فاتحول قلبي شجر صبار!
مساحة إعلانية
مساحة إعلانية
