المبدعون

حبكيات ... كانت ضِحكه شعر محمود الحبكى

2024-09-02 21:54:53 -

زمااااان
كُنتش أعرف ( ميكي )
أو ( تان تان )
كُنت أعرف عم عكاشة بتاع عَسَليَّه
و ( جوده ) بتاع جميز ونبق وبرتكان
علشان المصروف
كان دايماً ابويا
بيآخد ساتر من نَظَراتي
يقول لي مفيش فكه
كنت أضحك
علشان عارف إن أبويا
عُمره ما يكدب
وإن دا كلُّه ظروف نشفانه
وكان بيرطَّب
كنت أستنَّي لما يشطّب
والملِم باقي العسليه
وحبِّة جميز كان متعطّب
وآخد رُكن بتستناني
ملايكه يحبُّوا الفُقرا
ولما أرجع يحضنِّي أبويا
كانت روحه تشخلل قلبي
مش ب فلوس
حي وفَكَّه
لكن ...
كانت ضحكه