مساحة إعلانية
مساحة إعلانية
ماتحكموش على القتيل..يبوس ايدين اللى قتل
الله كبير .عادل،كريم ،يكشف ستار اللى حصل
أنا قلب عاش الحب فرض صلاه وصوم
انا مش نبي معصوم ولا عابد وساكن فوق جبل.
.........................................
أنا طير بعافر يمكن اوصل للأمان رغم الجراح
ماطلبش منك يوم تبدل ضيق حياته بالبراح
حارب وقاوم كان مناه يوصل اليك
ماتقولى ليه قافل عينيك عنه ومشغول باللى راح
.........................................
خلاص نسيت ؟ ومشيت وعديت المفازة؟
وكأن جرحي حق واخد به إجازة!!
ازاي تحمل قلبي حمل عليه تقيل؟!
وازاى بتقتل القتيل ووراه تعدد فى الجنازة
.........................................
الصبر من عندك ياعلام الغيوب
ياما حاولت ابعد وعن ذنبه اتوب
لكنه قدرى ومين يفر من القدر
أيوب صبر وبدعوه منه اتبدل المكتوب.
.......................................
يارب عفوك انى مغلوب فانتصر
وارحم فؤادى م العذاب المستمر
نور طريقى ونسي قلبي لوعته
نار فرقته خطيتها جمر ومستعر.
.................................
خايفة من القسوة تغير لي خُطايا
انا اللى جاتنى الدنيا ورميتها ورايا
ووقفت قدام باب هواه طالبه رضاه
ليه حسناتي معاه بيبدلها خَطايا؟
..............................
الفين سلامة ع اللى ارواحهم عليلة
واللى الدموع مونساهم كل ليلة
واللى بحكم الحب عاشوا مجاريح
سدينا باب الريح وراحتنا قليلة
.............................
يا مسطر المكتوب على جبين القمر
ووعدت بالفرحة لكل اللى صبر
طالبه رضاك قوينى واجبر كسرتي
مليت وطالت رحلتى..وتعبت من كتر السفر
مساحة إعلانية
مساحة إعلانية
