مساحة إعلانية
*مهداة لروح الشاعر الراحل حسام حسنى
أنا كنت لسه مكلمك
ومحدتك
وشكيت لى همك
يادى الحزن اللى
مش راضى يفارقنى
يادى السنين الميته
ف حلق الجوف
قلبي اتخطف
لما سمعت انك رحلت
عايز ابكى بس مش
قادر
قلبي اللي نافر
ف عز الغنوه ليك
وبكيت
شايل هموم الدنيا
والعوزه
الحزن ستين سنه
أسأل عليك ازاى
ومين حيرد عليا
مش كل شويه
نحزن كتير على بعض
الموت ياخى زى
سكين حاده
ترمح على الروح
وكأنها حواديت
كل البيوت بتعد أحزانها
عدوده تطلع م السما
وتنوح
يا حسام يا حسنى
أنا كنت لسه مكلمك
معرفش ليه الموت
بياجى من غير استئذان
وكأنى كنت ف يوم
أنا الغلطان
حقك عليا يا صاحبي
وسامحنى م التقصير
الحزن ملهوش دعوه
ولا تفسير
وكأن كان الغنا
داير مع العصافير
ألفين محبه وسلام
لروح الطاهره
مساحة إعلانية
