مساحة إعلانية
خففي التجاعيد شوية
كتري ضي الفلاتر
زودي اللمعة في عيونك
خلي بالك
من رنين الضحكة
و انت بتضحكيها
زودي الايكو شوية
و اكتبي دايما قصايد
فيها احساس التفاؤل
خلي سيرة الحب حاضرة
حتى لو طول عمره غايب
حطي باقة ورد حمرا
صبحي على أصدقائك
خلي كل اللي يشوفك
يفتكر انك سعيدة
صدقي كل الكلام
اللي في العادي بقولوه
ايه الجمال دا
انت هايلة
انت روعة
و اللي يبعت لك
على الخاص اشكريه
و ابعتي له قلوب كتير
القلوب الحمرا دي
اللي بتطير في الهوا
جمعيها في كف ايديك
سمعيها نبض قلبك
و اطلقيها في شاشة زرقا
كل ما فيها افتراضي
عيدي نفس الحالة عادي
كل ليلة
و كل يوم
عيشي فيها
أي كدبة في الوجود
بذرة صالحة تكون حقيقة
المهم تصدقيها
مساحة إعلانية
