مساحة إعلانية
مستغربين من حبي ليك
مع إنهم عاشقين عنيك
عاشقين خطاوي سكتك
والشمس ترسم ضحكتك لون الضحى فوق كل غيط
عاشقين حكاوي جنتك
ونهارك الأبيض يطير فوق كل بيت
عاشقين دفا حنيتك
والليل يمر بلمستك زى الحرير
والشوق يقيد
واما احكي عن إحساسي بيك
يستغربوا من حبي ليك
ما انت الحبيب وانت النصيب
وأنتِ اللي ساكن في الوريد
والحب قادر يحتويني ويحتويك
الحب إيد تاخد بإيد
لو حتى كان عمق المحيط
مستغربين من حبي ليك
مع إنهم يتمنوا يبقوا حاجة فيك
يتمنوا ياخدوا نظرة منك تروي ريق
يتمنوا ياخدوا من هوانا أى شيء
ليه العوازل مننا دايماً تغير
لما يلاقونا في الفضا دايماً نطير
نحصد سنابل حلمنا للمحتاجين
ونداوي كل المجروحين
نكتب على حدود المواسم مشتاقين
والفل ع الياسمين يميل
نسهر على همس الهديل
واسمع حكاياتك يا نيل
هى الحياة من غير هوانا تسوى إيه
من غير قلوبنا ما تراعيه
دي الثانية بينا في الهوى تسوى سنين
واحنا اللي علمنا الغرام للعاشقين
مساحة إعلانية
