مساحة إعلانية
* فى رثاء الشاعر أشرف البولاقي
مين قال غيابك ع العيون غربة ؟!!!
امتى الضيا بينام وتلفلفة التربة
بيشب فوق المستحيل ويبان
منتاش جبان بيخوفك خوفك
بتشد ب حروفك نجوم الليل
وتغزل م الوجع ضحكة
مقادير يا كاس الفرقة مكتوبلى
صبار يا طعم الغربة في بعادك
مين قال كفوفك بالوجع يا صاحبى حضنانا؟
وايه اللي خلاك تعشق غناك في الليل؟
اسمعني يا صاحبي
من يوم ما غبت الصبح خبى عنيه
ولا بان ضيا القمرة ولا مر ناحيتنا
وان كان على بيتنا
صاحي بيستناك ومصحي لمتنا
مين اللي سكتنا ؟
وانا كل صوت ألمح أنينك فيه
أجري على حضنك وابص لك ما القاك !!!
إياك خاصمت الحضن ونسيتنا ؟
والا دفاك غطاك بالسنندس الخداع ؟
حضنك بنات الحور
مبدور يا طعم الموت
حبات عرق فينا
قولى بتهرب ليه ؟
عاجبك كلام الخوف والنأوزة ف القول
الكلمة زى الغول بتلبش الجتة
القلب ف غيابك ياصاحبي 100 حتة
النبض متبعتر
والدم راح ولا جاش
والضحكة من يوم غربتك هربت
وصوتها اتحاش
هو انت خت معاك طعم الهنا والزاد ؟
طب قولي شفت البرد عامل في بُعدك إيه ؟
والبرق من غير ونس بيكهرب العريان ؟
سجان يا طعم الخوف زنازينه لم تفتح
ملقتشى انا مطرح
عاجبك رقادنا بخوف والعتمة ف عنينا ؟
لم الحروف وارجع
البعد بقى يوجع
ما تقولي ضحكك ليه ؟
فرحان بغربتنا
واللا الكفن عجبك ؟!!
أمانة طمني على روحي في بعادك
وابعتلي حتى جواب وارميه على بابك
ياشجرة الصفصاف لمي الفروع لمي
غاب اللي كان وسطنا نشوان وبيغني
وبقلمه يحمي الحما للقاري وال أمي
يا شجرة الصبار سمي عليه سمي
قلب البولاقي عمار للصحبة مستني
مساحة إعلانية
