المبدعون

مهرك ياست الحسن روحى .. شعر عبد الرافع الانصارى

2024-10-16 03:59 PM -

عبد الرافع الانصارى

الرجل طبت ع الرمال مسافات
والعزم أقوى من الوجع لو فات
ما يهز شعره من الولاد ألوفات
تقولشي شافوا الجنة فاشتاقوا. !!!!
الحور نادتهم لبوا ما اتهزوا
الخوف ما يعرف سكته ليهم
الموت يخاف لو شقوا لياليهم
وقلوبهم الخضرا في قلب الطير
متعلقة ع العرش والوعد كان انه
بالنصر يجيي الخير
كبر دا بكره العيد والعرس
فاتحنى
كل البيبان للجنة فاتحالنا
جات الملايكة صفوف...
كما طير عشق كف الولاد السمر
الدم يغلي في العروق كما جمر
كل اللى داس ع الزناد
رجاله ما اتعِدوا.....
عاشقك يا رمله وحضنك الدافي
لا فرق كنت أمير
أو كنت يوم حافي
لو كان غطاي السما والفرش تربتها
ما يدوس عليكي جبان
ولا يجني فرحتها
وصاني جدي وقال :
النخل ما يطاطي
ولا ينحني لواطي
فافهم
مهما يلاوعه الريح
ولا مره يستسلم
فانده بعلو الصوت
يابن النخيل ما تخاف
من يوم ما شق النيل ع الأرض
رمى تبره
الفجر صاحبه والقمر عشقه
لو مره تااااه في السكة
الخطوة مرسومة
نادي على "ثومة"
"مصر التي في خاطري وفي دمي"
"عبد الوهاب" "يانيل ياللي هواك سَحره"
ملايين من اللي بيهتفوا وبيعزفوا سحره
لكنه دينه وديدنه إحنا
مزروع في ملامحنا من يوم ماسال الدم
فوق رملها واحنا
حالفين
ندق العلم فوق كل خطاوينا
نرسم سمار روحنا
نسأل عن اللي اتمرغوا
فوق تبرها عاشقين
طب واللي حق الدين واللي أمر بالنصر
احنا اتولدنا كدا بالفطرة نعشق مصر
على أرضها مسرى البتول
واسأل رمال الطور
اقلع يا موسى النعل واتوضى
الطور مقدس فاوعى الدرر
ترموها للخنازير
وإن مت راجل راح يتزرع اسمك
وان كانت النار فوق الرؤوس أنهار
عدي وفوت
واللي يخاف م الموت يموت
النصر جاي والقوة عند الله
أرغول يغني ويدعى بسم الله
الدم مسك اهو عطر الميه
غنى العريش ع الشط رقصت له بلطيه
وزحف لحد النيل حضنه بحنيه
الرك ع النية
كل الولاد بيكملوا الصورة
أنت اللي منصورة واحنا اللي خدامك
جبريل على صفين ملايكه
بينحروا الخنازير
الدم كان ويا العرق سايل
الرملة نزلت للقنال لاجلن ما تتطهر
غطى الفنار والقلعة والأزهر
شالها الحرير منقوش
ع الجبهه يتمخطر
الشمس طلعت بالدهب عناقيد
الرجل طبت ع الرمال مسافات
وصلت لآخر شبر
م العز واتحنت
عاش اللي قال للولاد نعبر نعدى يا " مصر"
ورسم على شط القنال ساعة النزال
100 نصر