مساحة إعلانية
أولها بنصلي ع الزين
بنينا أعطر صلاتى
العز فى جنابو عزين
قوى بربى صلاتى
.....................
لينا جد ياما حاز فدادين
الله يرحم جنابو
لكن نبينا فدا دين
الكل عاش ف جنابو
.....................
درب الشهامة فيه أمشى
وإن رجعونى ما راجع
واللى كتبته فى هامشي
ما تكفيهوشى مراجع
.....................
مين اللى نبته كنبتى
مين اللى يعرف وصوفى
يعشقشى قعدة كنبتى
إلا اللى زاهد وصوفى
.....................
مين هام ف الحب قبلى
يا بت ما تهزريشى
ده بنات بحرى وقبلى
عشقونى ما اتهز ريشى
.....................
مين اللى بنته كبنتى
ليها طعم زى المربى
أول ما تركب كبينتى
بيقولوا عاش اللى ربى
.....................
لو أمها كلمتها
بترد والرد أحلى
دى البت طالعة لمامتها
عسولة والأم نحلة
.....................
درب الشهامة فيه أجرى
واخد العطايا عن إيدك
واللى بيسعوا فى هجرى
الله يسامح عنيدى
.....................
عشق البنتة تعب ليك
يللى أنت مشغول بنته
لو بت قالت تعا ابليك
تبليك صح البنتة
.....................
يللى زمانك لعب بيك
زيك زمانى لعب بى
حالف بهمى لعبيك
م أنا همى واصل لعبى
*مبادرة "كل يوم شاعر" التى يعدها ويقدمها الشاعر حمدي حسين
مساحة إعلانية
