مساحة إعلانية
وسط كل الدوشة اللي حوالينا على السوشيال ميديا ووسط سباق غريب على صناعة التريند
خلونا نتكلم شوية عن شاب يستحق فعلا انه يبقى تريند
اسمه مارك مراد
مارك اتولد وهو بيشوف وعاش جزء من طفولته مبصر وبعد كده بدأ بصره يضعف تدريجيا لحد ما فقد بصره تماما
تخيل شاب صغير الدنيا كانت قدامه مفتوحة وفجأة يبدأ يفقد قدرته على الرؤية .. محنة كفيلة انها تكسر انسان
لكن مارك عمل حاجة مختلفة بدل ما يسأل نفسه طول الوقت ليه انا ؟؟ بدأ يسأل سؤال تاني .. ازاي اقدر اساعد نفسي واساعد غيري ؟
بدأ مارك يتعلم البرمجة من الصفر
ومن احتياجه الشخصي لفهم الصور والمستندات والحياة اللي حواليه بدأت فكرة ScribeMe .. ده تطبيق يعتمد على الذكاء الاصطناعي علشان يساعد المكفوفين وضعاف البصر على فهم ووصف العالم اللي حواليهم
وبعد كده الحكاية كبرت
التطبيق وصل النهاردة لآلاف المستخدمين في 140 دولة
وأدمج مع نظارات ميتا الذكية علشان المكفوف يقدر يسمع وصف مستمر للمكان والاشياء اللي حواليه من غير ما يحتاج يمسك الموبايل في ايده
والاجمل من كده
ان ميتا نفسها تواصلت مع مارك وعرضت عليه شراكة وبقى ScribeMe بحسب ما اعلن مارك خامس تطبيق على مستوى العالم يعمل على نظارات ميتا الذكية
شاب مصري .. فقد بصره .. اتعلم البرمجة .. حول محنته لفكرة .. وحول الفكرة لمشروع .. والمشروع النهاردة بيستخدمه آلاف الناس في 140 دولة
طيب بالله عليكم
مين اللي يستحق يبقى تريند مارك مراد
ولا انصاف المشاهير اللي بنصنعهم كل يوم .. مين اللي يستحق ملايين المشاهدات
شاب فقد بصره فقرر يساعد غيره على رؤية العالم بطريقته .. والا واحد خارج من السجن بيحكي لنا على تيك توك ازاي كان بيتاجر في المخدرات وازاي كان بيضرب وازاي كان بيهرب من الشرطة
احنا عندنا مشكلة حقيقية في تعريف كلمة نجم .. بقينا ساعات نصنع نجوما من الدوشة اللي حواليهم ونصنع مشاهير من الجريمة وبندي مساحات ضخمة لناس كل مؤهلاتهم للشهرة ان عندهم حكاية مثيرة او فيديو يعمل مشاهدات
وفي نفس الوقت ممكن يعدي من قدامنا شاب زي مارك مراد من غير ما ياخد جزء من الاهتمام اللي يستحقه
وعشان كده انا شايف ان صناعة التريند مش مسألة بسيطة كل مشاهدة بنعملها هي تصويت .. كل مشاركة هي تصويت .. كل متابعة هي تصويت
واحنا بايدينا بنقرر مين يبقى مشهور ومين يبقى نجم ومين يبقى قدوة لاولادنا
لازم مارك مراد يبقى تريند .. ولازم كل شاب زيه يبقى تريند .. كل باحث .. كل مخترع .. كل عالم
كل طالب بيحاول يعمل حاجة مختلفة
كل انسان اخد من محنته قوة بدل ما ياخد منها مبرر للاستسلام
دول اللي يستحقوا الشهرة
ودول اللي يستحقوا المساحات
ودول اللي لازم ولادنا يعرفوا اسماءهم
مارك مراد فقد بصره
لكن الواضح انه كان شايف حاجة ناس كتير مبصرة مش شايفاها .. شاف ان المحنة مش لازم تكون نهاية .. وشاف ان العلم ممكن يحول الالم لحل
وشاف ان التكنولوجيا ممكن تخلي تجربة انسان واحد سببا في مساعدة آلاف البشر في 140 دولة
وعندي دعوة اتمنى انها توصل لكل النقابات والمؤسسات في مصر وعلى رأسها نقابة المحامين .. اتمنى اننا نشوف تكريم حقيقي لمارك مراد بس ياريت أنول شرف تقديم حفل تكريمه
مش بس احتفاء على السوشيال ميديا ولا كام بوست وكلمتين حلوين وبعدها ننسى الحكاية
تكريم مارك هو في الحقيقة تكريم لقيمة العلم والارادة والابتكار
ورسالة لكل شاب مصري ان المجتمع شايفه ومقدر نجاحه ومستعد يحتفي بيه لما يقدم حاجة حقيقية للناس
واتمنى من نقابة المحامين تحديدا انها تبادر بتكريم مارك وتفتح بابها لنموذج انساني وعلمي يستحق ان نقف له احتراما بس ياريت أنول شرف تقديم حفل تكريمه لان دور النقابات والمؤسسات مش بس انها تكرم ابناءها
لكن كمان انها تكرم النماذج اللي تستحق ان نقدمها لاولادنا وللمجتمع
كرموا مارك
وخلو التكريم نفسه يبقى تريند
ده التريند الحقيقي
مساحة إعلانية
