مساحة إعلانية
لما تقول شعر اعرف مين هيسمعك
علشان الحتة اللي شايلها في قلبك
بتبان على شكل إيقاع
سايب نفسه لمزيكا واحاتي
ملضومة ف خيط بينور
لما تدخل ساعة العصاري
وانت عمال تفتل ليف أشواقك
مع كباية شاي ما اتعملتش في أي مكان
على حطب الروح
الروح بتروح لآخرها
تلقى سواقي الحزن اللفافة
بتعبي وترمي الأحزان الناشفة
زي جريد له سنتين ع النخل
الشقيان
لا الريح تسمحلو يوضب حلم خفيف
جنب قناية بتروي فدادين مش متشافة
وعيون مش خوافة
طب هنا تقدر تتكلم
مع حبة هوا بينسنس على قمصان ما اتلبتش الا عشان المشوار
العصر بيسلم ورديته للمغرب بشويش
اللي جاي يرمح علينا
وكأن فيه حد بيجري وراه
هيفوت بعد شوية علينا زي اي حاجة بتعدي
وطارق فراج راح يعزمني ع الحضرة
وانا لو مش رايح المشوار إياه
كنت هشد معاه
طارق فجاة طار لفوق
أنا ما مش مستغرب
طارق مش أول مرة يطير.
مساحة إعلانية
