المبدعون

قدَّها وقدود

2023-11-19 10:03 PM -

نادية البسيوني

نادية البسيونى
بلدنا قدَّها وقدود
ولو تاهت … بخطوة تعود
ولا يرهبها عاديها
مادام رب العباد موجود
أشوفها الفجر بتصلي صلاة الحب وتنادي
يا رب احفظ لي أولادي
وخطوة نيلي قويها
ويفضل عالي ما يطاطي
أشوفها الصبح زى الورد في بداية نهار رزاق
تزيح الليل عن الشباك
وعود ياسمين يلاغيها
فتبعث للطيور أشواق
أشوفها الظهر لون الصبر ما يعافر بإيد شقيان
وقلبه العاشق الولهان
في ضل جناح حواريها
يراهن بالأمل أميال
أشوفها العصر واقفة بطولها بين شطين
على بساط المحبة تميل
وطيبة قلب في عنيها
تبيع الفل للعاشقين
أشوفها المغرب المُغرم بنقش الشمس في إيديها
ولون القمح يتغزِّل في ضحكة صيف سواقيها
وكام موال على الصخرة مدح فيها
وصوت الناى يقول ويعيد غناويها
أشوفها الليل طويلة البال
بتحسبها بربع هلال
تفكه نجوم فتهديها
وتصنع منها خيط مغزول سبع ألوان
بلدنا قدَّها وقدود
مفيش حاجة تلوَّعها
ولا تنسِّيها طعم النوم وتشقيها
غير انك تبقى يوم مهموم
هنا اتعلمنا معنى الصوم
ومعنى رضانا بالمقسوم
ومعنى العش لو ملموم حواليها
ومعنى الجندي لو مجهول
يا صرخة هون
يا غربالنا اللي داير دور
يا أول حرف كان منحوت على جدران حكاويها
دي أول بختنا المولود
وآخر حلم قبل الموت
وليه اللوم يسوق فيها
ومهما تجود يعاديها
بلدنا مش مجرد كاس
يا جاني الشر باستفزاز
بتنكر ليه أياديها
كأن الجنة فوق الأرض ما تنداس
بلدنا الروح ونفديها
بنبني … وانت إيه فيها
ملكش شعور يراعيها
ملكش جناح يطير بيها
ملكش لسان يراضيها
أَقلُّه تقول سلام ليها