مساحة إعلانية
قبل الطوفان ما يهل
الشمس بتنزف ضلها ع الاسفلت
والروح ماليها سراب مقفولة م العتمة
النبض بيهرفط فى صدر اتخنق
بالصمت
وانا طفل أكبر م السنين
عاش دنيته فى كتمة
خمسين خريف م الشقا متصلبين فى الحلق
مستنيين الموج يهد الحيط
ويدخل فى ايده بلاوى كل الخلق
يحدف أرواحهم فى حجرى..يكسر قزاز الروح
ينبش فى درج السنين المردومة بسكاتى
يطلع ورق دبلان شارب ألم روحى
تطلع وشوش لوثت الدم فى جروحى
يطلع رغيف العشم متعاص بطين الغدر
وطعنة من أقرب إيدين بايتة فى نص الصدر
تطلع سنين عمرى وقلب اندفن ببلاش
ورغم ان عمرى ما خنت
تطلع حبيبتى تقول لو صدق كان عاش
حسرة وندامة يا ليل على عمر راح ببلاش
مساحة إعلانية
