مساحة إعلانية
أنا عاوزِك
زي ما عاوزاني
شطِّي
و ملاذي
و عنواني
عاوزِك
تبقي لي سفينة نوح
تاخديني
بعيد عن أحزاني
أنا عاوزك
في العتمة القناديل
و تكوني نهار
في الصبح ما يفرق
أو كان ليل
أنا عاوزك شمس
قمر
و نجوم
عاوزِك
تكوني لي المستحيلات
و انسى ان انا قبلك كنت عليل
أنا عاوزِك
عني ما تستغنيش
تستني معايا
و لا تسيبينيش
و في عينك
احس ان انا فارس
و رجال الدنيا ما تشبهنيش
أنا عاوزك إيد بالحب تضم
تكوني لي حبيبة
تكوني الأم
حنِّية قلبِك تحاوطني
و تنسِّي القلب الويل و الهم
أنا عاوزِك تبقي لقلبي جناح
و نطير أنا و انتِ
بدون تفسير
من غصن لغصن بنتمايل
و كإننا أسعد جوز عصافير
أنا عاوزِك
تبقي لي الإلهام
و النور الساطع في الإعتام
أكتب في قصايد
لأ دواوين
في عيون مليانة حنين و غرام
أنا عاوزِك
ضحكة ترد الروح
و لغيري النار
و عذاب
و جروح
و أشم في عطرك وحدي و بس
طيفك يحاوطني
منين ما أروح
و ف غيبتي تصوني ما بينا العهد
و لصوت الناس ودنك تتسد
أنا عاوز حبك
شمعة و عيد
و أدارى عليها
عشان ما تقيد
من عين تحسد
و تفل حديد
ما هو غصبٍ عن كل الحاسدين
جمَٓعنا الله من غير مواعيد
مساحة إعلانية
