مساحة إعلانية
صباح الخير
على عيونك
ياصاحب بسمة افراحى
وضحكة قلبى لو دمع
ولهفة شوقى لو ولع
وبدلع ...
عليك ياما
صباح الحب والاشواق
وع العشاق
لا ملامة
صباح مرسوم على الميه
فى نهر النيل
وبتغنيها أغنيه
عروسه البحر على شطه
وبتقلدنا ف المواويل
صباح بيعلم العشاق
جميل الصبر
على بُعدك
وانا بَعدك
يتيمه مجاشى عندى العيد
ماهو انتَ كنت فستاتى
وتسريحتى
وشريطه تلفنى فيونكة
صباح من أول دُرنكة
لحد الحَرَجة ونقادة
صباحك حب كالعادة
صباحك وردتىن جورى
اللى فوق الخد
صباحك فل ياغالى
يمالك قلبي متسجل
وصاحب المِلك ماله بديل
صباح بيمر عبر الليل
على كفى
عشان ييجى لحد عنيك
ياربي كلمة ........؟!
تكون وصلاك وتكفى
مساحة إعلانية
