مساحة إعلانية
من ضهر أبويا
لبطن أمي
على بطن الأرض
رحلة غريبة
أنا عايشاها
بالطول و العرض
الرحلة أشبه بمغامرة
أجمل ما فيها إنها غامضة
ما أعرفش إيه الجاي بكرة
الحلبة مفتوحة و حرة
و اللي اتهزم يطلع برة
و مفيش إعادة و لا استئناف
عمرك طويل و لا قصير
دورك كبير و لا صغير
هي الحياة لغز يحير
و ما بين ميلادك و نهايتك
بياع حكاوي تملي يفوت
فيه قطر ماشي بيقول توت
كل اللي ينزل منه يموت
الرحلة تقصر و لا تطول
قلبي خلاص
ما بقاش مشغول
غير بس باللحظة الأنية
حتى و لو كانت فانية
حلوة و تستاهل تتعاش
مساحة إعلانية
