مساحة إعلانية
عدت سنه والوجع ....فارش حصير عندي.
لا صعب عليه حالي ...ولا دمع على خدي.
الحظ خاصمني ...وعاداني كام مرة.
قلت :الحياة مُره....قالوا:السبب عِندي.
***********************
دانا كل حزن اتكتب ...كان لي فيه سطرين.
سطر اتكتب واتشطب...والتاني بكى العين...
كان القلب غفلان...قسمة ومكتوبة.
بيـّت مغلوبة...من غير سَلف ولا دين.
***********************
ياحنضل المكتوب ...مرك صبغ توبي.
فصلت حزنك توب ..ولبست أنا توبي
الرحمة يااهل الود...قلبي تعب أنات.
عدى الزمان وفات..ولا نلت مرغوبي.
***********************
أبكي على اللى راح... والا على اللى جاي.
سجر الحزن طراح...قدامي وألا وراي.
قالوا خدوا الحكمة..من خشمة المجانين..
عدت عليا سنين...والحزن ضيف حِدَاي.
***********************
لا صلاة فى جوف الليل...ولا شمعة متقادة.
رقت لقلب عليل..والعلة بزيادة
كام مرة قمت الليل...أدعي وأقول يارب.
جفت دموع القلب..والدعوة متعادة.
***********************
عشمانة مش هيأس...من خبطي ع البيبان.
يمكن ياجيني ليل ..يقبل دعا العشمان.
قلبي صحيح مكسور...بس الأمل موجود.
فى ربنا المعبود...الفجر تاني يبان.
مساحة إعلانية
