مساحة إعلانية
مساحة إعلانية
بين الفن والأدب في واحات الجمال الإلهي
علاقتي بالفن التشكيلي بدأت مبكرا جدا في سن العاشرة تقريبا كان أول معرض أقيمه في حياتي كلها في نادي الخارجة الرياضي واللي افتتح المعرض الدكتور فاروق التلاوي الله يرحمه المحافظ المحبوب وكنت يومها عامل ستارة من نوي البلح وكان معايه الفنان الخطاط عبدالقادر مغربي وكان الله يرحمه عمي خلف أيوب وعمي يونس عبدالعزيز عايشين وكان الدكتور يسري معاذ أمد الله تعالى في عمره وبارك فيه هو مدير النادي وكنت بشتغل اركت وعملت نجف واباليك وكنت بشتغل حرق علي الخشب وبعد ما رحت الاعدادية فى مدرسة ناصر أولا ثم مدرسة صلاح الدين بدأ الشاعر المتواضع الصغير يظهر وكتم على نفس الفنان التشكيلي الصغير المسكين لغاية اول 2001ايام جمعية إحياء التراث ساعتها بس لقيت نفسي عمال أرسم والون وأفن وكأني بقول للشاعر اللي جوايه متقدرش على الفنان وبدأ فن جديد معايا هو فن النحت على جذوع النخيل والرسم بالرمل وكانت كل الأعمال مستلهمة من فنون الواحات يعني رسومات الحج والكتابات البديعة اللي مكتوبة على الحيطان في الخارجة بعد كده ربنا كرمني وبدأت أعمل معارض بإسم الوادي الجديد في دار الأوبرا المصرية ومتحف محمود خليل وحرمه وبعد كده عملت معرض في بيت عميد الأدب العربي طه حسين مركز رامتان الثقافي وفتحه استاذي وصديقي الفنان محسن شعلان رئيس قطاع الفنون التشكيلية في مصر وبعد ذلك معرض اسمه صالون التراث والصناعات التقليدية ومعرض اسمه معرض ايليت للديكور ومعرض في جامعة المنيا العريقة
الواحات بلاد طيبة وملهمة وأهلها ناس طيبين وكان نفسي أعبر عنهم وأعرف الناس بثقافتهم الشعبية المصرية العريقة المعرض الأول في نادي الخارجة كان في 1985واول قصيدة نشرتها في مجلة الواحة كانت في 1988يعني سبق آلفنان الشاعر بأعوام تلاتة لكن تقول ايه الشعر كان طاغي لأن الفنون الجميلة اللي الواحد سمعها في الواحات من أغاني شعبية وحنين للحج وأعاني العاب زي حج حجيج كسر الجليطه الطالعة والنازلة دي تقول لدي يا خيتي شيلي دي وحطي دي.الغريب في الأمر اني كنت مش عارف أنا بعمل كده ليه بس في الآخر عرفت أن بلادنا ليها علينا حقوق منها ان إحنا نعرف الناس بالفن التشكيلي والكتابة الإبداعية ايه هيه الواحات وايه هوه جمالها الطبيعي الآخاذ الساحر علي قد جهدنا المتواضع وطبعا أهل بلادي ملح الأرض وسكر القصائد
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
