مساحة إعلانية
* فى رثاء محمد سلطان
يعني يا ( محمد سلطان )
بتغفِّلني وتغيَّر في العنوان
ما كُنت معاك يا أبو خالد
من كام يوم
وشربنا الشاى
وفتحت القلب لآخره معاى
ولَّا أنت تكون يا أبو خالد نسَّاى
يعني خلاااااص
من قبل ما أقول يا محمد
أقول المرحوم
كل ما تليفوني يرن
أقول أبو خالد
حتي ولو غرقان في النوم
ما أنت كمان يا محمد طيِّب
وحبيِّب
وما تتعيِّب
مش حِمل الدنيا الكدَّابه
وحِمل هموم
وعلي العموم
الكل بيشهد إنك
عُمر في يوم ما غلِطت في حَد
أو قصَّرت اليد
دايماً بتقول حاضر
حتي ولو مش قادر في الرد
وأكتر واحد شوفته خدوم
رحمه ونور يا أبو خالد
السيره أطوَّل م العُمر
وسيرتك يا محمد
في قلوبنا
يا غالي
لآخر العمر تدوم
مساحة إعلانية
