مساحة إعلانية
مساحة إعلانية
مش باكتب شِعر علشان أكون
متشعلق ما بين حركتين وسكون
برَّه التصنيف
برَّه التكتيف
برَّه التعريف
ممكن ألخبط زى مشاعرى
لا بأسكن بيت
أو حتي باكون مسكون
باستحمل كل النظرات
اللي مش بالعيون
تآخد كل حروفي
وهااااات تقطيع
هات تمزيع
هات ترقيع
وبرغم دا كلُّه بالملم جِتتي تاني
لا لوني يميع
أو تتغيَّر مشيِّتي علشان مش موزون
باكتب مش بالعافيه
أو تشغلني القافيه
أو إن الأرض تلِف تحُك في عيني
وأشوف السما صافيه
أو إن جبال الهَم
مش في خريطة جغرافيه
أو إن الحُب بينفُخ قلب السَقعَه
ف تصبح دافيه
أو إن العقل يفُك قيودُه
ف يبقي في عُرف الناس مجنون
مش بأكتب شِعر عشان أكون
أنا باكتب للِّي بيشبهني في روحي
لا ف تقاطيع
أو شكل ولون
أنا باكتب للِّي بيقبلني بعيوبي
وباسلوبي
وبدون ما بيملا جيوبي
أو يدفع عربون
مساحة إعلانية
مساحة إعلانية
