مساحة إعلانية
مساحة إعلانية
الساعه خمسه الصبح
وعيوني ع الشباك
شفت النهار بيتولد م الليل
والشمس وسط العماير
بتفتح الشبابيك
وتنقط العمارات
الناس على الشارع
وبمسح السيرفيز
الرصيف م الناس
ومسحني وياهم
النوم مكلكع سحنة المخاليق
ف مواصلة الاقاليم
وهي الوحيدة
اللي نورها الشمس
زغلل مراية عيني توهني
فكت قفول الشعر وندهني
جرت في ريق...
قلمي اللي كان نَحّس
يجي ١٠٠ قصيدة اتكتبو من نظرات
*و راوضني سؤال
*كان غريب جدا
هما الملايكه بيركبو مواصلات؟
كان عادي يعني اشوفها وتشوفني
كان عادي يعني تبصلي وتبتسم
واشوف بعيني الميكروباص بيطير
كان شعرها الشلال
زي الكمانجا
او اضل سبيل
والانسيال...
بيشف منها الاسم
كتبه ياقوت
وكات ياسمين
والاسم دالق صفته في الملكوت
خلت ريحة السجاير تتقلب رياحين
ف عيونها جنه وبلكونات وبحور
تقولشي اسكندرية شايفها حواليا
طرق الشئون اتحولو ايطاليا
ماشي بسافر والقصيد باسبور
تضحكلي بنت الجاه وتأشر الفيزا
وفقير يارب وحظي من كستور
وهي بنت ذوات تقولشي موناليزا
قاعد وباصص فيها واستعجب
بنجور لعينها و ٣٠٠ بنجور
لففنا يسطا ولف بينا ولف
ابعدنا يسطا ولف بينا الكون
لففنا تاني ولف متوقفش
انا عشت بحلم بس مبحققش
"ازاي يرب الضحكه بنت الجاه
تطلع مابين الفول و بلاصات المش"؟!
خلت يارب الفرح يعرفني
ساعة بياخدني الفرح من ايدي
وبدون ما تقصد رجعت بتحزني
انا كنت عايش جوا الحلم ببني قصور
وفوقت وهي بتنده السواق
على جنب يسطا
يسطا نزلني
مساحة إعلانية
مساحة إعلانية
