مساحة إعلانية
اهو جه برزالتُه الليل..
ماسِك في ايد الفِكر، وفي التانية الحنين..
بالصدفة مع جُملِةْ: "بتفكر في مين"؟
"عامل ايه الشوق معاك" ؟
"عامل ايه فيك الحنين"؟
اول ما بسرَح، عيني بتبكسِل..
وصلِت رسالة من صديق
مضمون رسالتُه : " الصبح مستنيك"
وتدريجياً تبهت الألوان..
كانت بتاخد رأيي في الفستان
قولت لها سطر، من نص للطحان
ووصفت جزء من الغياب ببيوت
وإزاي حاجات بتموت
وإزاي سنين بتفوت
واحنا.. في مطارحنا
والموت بفرط حنين
والشوق ده فرن بطين
والحب.. مطارحنا
وازاي يكون إنسان
محبوس في أغنيات
والحبسة دي ضِيقَة
فيها جَلد أُمنيات
رجعت بتاخد رأيي...
فستان طويل وشيفون
مالكش ولا حِجة
هات بدلة نفس اللون
قولت لها: ده الماتشينج..
محتاج اجيب له قرون
خليتها والله م الضحك بتعيط
بتقول لي Side Slit
قولت لها يتخيط
واضحلها إني تقيل
مهما تقول من غزل
مع إني والله من جوه بتنطط
كانت تحب الست، وتيجي تسألني ..
عن بعض أغنيات
وتقول لي بتحبها ؟
أرد.. "في المطلق انا بعشق الستات"
واشوف غيرِتها ألين
تحكي لي عن جَرحها
وكُرهها لـ "تـِ شرين"
وتقولي شهر حزين..
ذكرى وفاة بابا
وعينيها تتحول من خُضرة.. لسَحابة ..
قبل الدموع ما تبان ..
تجيب كمان فستان ..
وتقول لي ولاااا غلطة
ناقص نشوف شنطة..
أبص في عينيها
يا رب سبحانك
دي عينين ولا ورطة ؟
تقولي والفستان؟
توصل رسالة كمان
وبقينا وش الصبح
صاحبي اللي روّح نام
باعتلي: صحّي النوم
ورانا كوم مشاوير
واليوم مافوهش كتير
ردّيت: سامحني هنام
بقالي طول الليل
سرحان مع الفستان
"كل ليلة وكل يوم"
هفصلها م التكرار
يبعت رسالة كمان:
ما بقيتش ليك يا حمار
وكلنا عارفين ان انت مش نازل
يعني انت قولت جديد ؟
تزامناً مع بيت
"طار بيا الأمل بجناحه"
لكن بفوق القاه اتكَسَر
واليأس ع الأمل، انتَصَر
من وقتها مش عارف اطير
ولا عارف امشي معَ البشر
*مبادرة "كل يوم شاعر" التى يعدها ويقدمها الشاعر حمدي حسين
مساحة إعلانية
