مساحة إعلانية
مساحة إعلانية
شوفت العيون؟!
كانت هنا..
وسط المرايل والتُخت..
والفسحة تفرح لمّا تلمح حد بيدق الجرس
شوفت العيون!
لو محبوسين واتوجهوا لمّ البيبان
بالنظره هيموتو الحرس
كانت إذا تهمس كده
ترسم علي البحر الشفايف يبتسملي
والضحكة تهرب م الجيوش تجري فـ عينيا
كانت إذا تغمز كده
تِهدم في قلبي حتة القسوة اللي فيا
طابق عليا الغلب ومطبق فـ روحي
شدِّت لحاف الدنيا فوق منّي اتعَافيت
شوفت العيون!
أنا كنت بكتم قصّتي بصِّت عليا بـ قلبها فجأة اتحَكيت
إيه اللي زايد فيها يعني ع البنات؟
وازاي اشوفها ويتفلت منّي السُكات
باصص عليها وببتسم زي العيال
تفرش فـ قلبي فدّانين م الأمنيات
"شوفت العيون وكإنهم" محراب غرام للأوليا
يرتاحوا فيه
الشمس تفرح لما تتمشي بهدوء
والليل بيجري عشان تمد إيدها وتسلِّم عليه
شافها القمر
ولقيته شوّح في النجوم وفـ ثانيه بيشقلب كيانُه
زعلان عشان
في بنت قادره تشيله وتنور مكانُه
رفعت عينيها لـ السما
شدِّت بإيدها الفرّح من قلب الغيوم
زخِّت مطر
مشْيِت بعييييد
حسّيت ساعتها بالخطر
وبفوق علي صوت الزحام
والعسكري واقف يقيدلي المُخالفة
والناس تشاور كلهم واقفين حياره
آسف عشان
شوفت العيون ماشيين هنا
خلوني وقفت الإشاره.
مساحة إعلانية
مساحة إعلانية
