مساحة إعلانية
مساحة إعلانية
عاوزاكْ تكون لي نهار في ليل
وتكون مراكبي في وسط نيل
عاوزاك تكون لي طوق نجاة
من حزن عشش من سنين
ف صحاري ضلِّت خطوتي
تبقى لي طول عمري الدليل
و ابقي شمسَك
و ابقي ضلَّك
و ابقى منَّك
و ابقي فيك
عاوزة حُبَّك يبقي طاغي
بيه تداوي روح كسيرة
عاوزة تملا لي فراغي
و عيني ليك تبقي أسيرة
و امَٓا احس بفيض أمومة
تبقى لي طفلي الجميل
تيجي تندهني ب ماما
قلبي يرقص لك يميل
و ان نقصني شعور أمان
تبقى أب يفيض حنان
و ان سكنني في ليلة خوف
بيك ألاقي الخوف أمان
تبقى سندي في الظروف
عاوزة احس انك حاميني
م الديابة و م الزمان
لو يكرمش جلدي يوم
من زمان أو من هموم
عاوزة إيدك تبقى بلسم
بيه بيفطر بعد صوم
عاوزة تبقي لي أبويا
إبني ممكن
أو أخويا
في العموم تبقى لي أهلي
و الحبيب الغالي جدًا
تبقى حاكم
جوة دولة قلبي وحدك
و ابقى وحدي
جوة قلبك
المليكة و الشريكة
يعني يعني باختصار
زي عنوان القصيدة
مساحة إعلانية
مساحة إعلانية
