مساحة إعلانية
كَريــــــم٠٠
هُـــوَّ اِللي كاشف
قَلب كُل لئيم
يُلْقُف بَطن الشارع
من كل بيوته
عيال ورجال وحريم
يِقرب الصوت ومعاه
العم رزق السقا شايل قِربته
مِتشَعبطه كالطفل لازقه في جَنبِته
بِيدِحْ دَحْ في مَشيته
سَقَّا لبلدنا من زمان وَحْدِيه
كام سَقَّا فات قَبْلِيه
كُلْ البيوت عطشانه لِيهْ
وعَمّي رضوان من زَمن
قاللي حقولك قصته
لِقيوه مَشقوق الراس
ورَمِيه تَيّار النيل ع الجَرْفْ
ومُغْمَي عَليه
وسفينته كانت قِربته
ولاجلن بَهيه طَلعته
قالوا إنهْ كان سَقا لبلد
أجمل بناته عِشْقِتُه
والعشق يا واد كالنار في البوص
والسِر في قلب إتنين عُشاق
مَيَّهْ مِعَبَّايهْ في مَقْطَفْ خُوص
وعَشَان حبيبته مِأصَّلَهْ
ومَفيش مَحَاكِم في البلد
أسرَع ما فيها المَقْصَله
ولاجلن يداروا المسأله
ولا حَدْ يعيد ويزيد
حَدَفوه في وسط النيل
ياخدُه التيار لبعيد
والخَضرَه تِنَبِعْ
والجِتَه ال فيها الروح حتعيش
ربك جَعل له في نَجْعِنا
مأوَي ولُقمِة عيش
لكن ربك والحق
من يوم عرقوب رجليه
في أرضنا دَقْ
م الخُصْ اللي بَناه ع النيل للجامع
بِيدَنقِرْ رأسه لما يشوف
طفله مِعَدِيَّهْ في شارع
يامُسَهِلْ٠٠ياساتر٠٠بَصـــــــيرْ
تِقوم تِنادي جِدتي
خَطِّي العَتَبْ وادخل يا جَايِبْ الخير
إملي يارزق الجَرَهْ وَ يَّـا الـزِير
ويطُلْ كأنه سَايِق النيل
قِدَّامُه لِقَلب الدار
مرزوق تَوِّي ما بَرَاد الشاي
بِتَاعي مِفَارق النار
تخرج مِنُّهْ بَعد ما يُشْفُطْ
من كُبَاية الشاي الآهه
تُنْتُرْ كل هموم اليوم معاها
وتدِسْ في إيده الجِده
قالب الجبن وكام بيضه وجنيه شَهرِيَّه
إتقَوَّتْ وأول مايهِل الغايب
ليك يا رزيق جلابيه
غرقان من خيركم بزياده
روحي ما يقطع ليكي
المولي العاده!
*من مبادرة" كل يوم شاعر" التي يعدها ويقدمها الشاعر حمدي حسين
مساحة إعلانية
