مساحة إعلانية
مساحة إعلانية
قلبي انتفض
من بين ضلوعي ورفض
إنك تكوني حلم عابر وانتهى
مابقاش في عمري يا عمري شئ
بعد الفُراق راح يُشتهى ..
ما بقتش أحن أنا غير لأيام الصِبا
والطبطبة
ولحظة .. عشناها بغبا
لحظة أمل
ولا أقول لحظة هبل؟
أنا بارفض إني أكون جمل
على ضهره ياما حمول حمل
وارفض كمان أكون حمل
ما يعرف إلا يكون وديع
في كون وضيع
في كون ما عمروش اعترف
غير بالقرف
وأنا وإنتي ايه؟
ولا إحنا مين؟
آه يا حنين قلبي الحزين اللي اتملى
حِزن وملا
بحِزنه السنين
مليت أنا جراحي ومليت الآنين
يا عازفين لحن الوفا
ليه إختفى
لون البياض؟
والغل عاد
يفرد جناحه ع الوجود
يا زهرة العمر الجميل المُبتلى
يا اللي زرعتك غصب عني
في الخلا
ماتر حليش
وماتفوتيش روحي بلا
نور في الفلا
رغم الفراق
ماتر حليش
وما تفوتيش روحي بلا
نور في الفلا
رغم الفراق
لساني بحلم باللُقا
بعشق عذابي والشقا
فما تنصبيش المشنقة
لقلبي الوليد
وما تقتليش فيا المزيد
من الأماني المجهدة
ما تشمتيش فينا العدا
أنا اللي مشنوق الخُطا
في درب الحياه
تحيني ضحكة
تقتلني آه
حلمت أكون ليكي الأمير
و حلمت أكون ليكي المصير
و حلمت أكون ليكي الضمير
اللي بيهدي خطوتك
لكن غبايا هدني
وللمهالك شدني
لا عرفت اتوب عن سكتك
ولا قلبي جافي محبتك
ولا حتى قلبك ودني
ما تهربيش
أنا في اشتياق اسمع يا عمرى كلمتك
إيه سكتك؟
وإيه اللي خانق ضحكتك؟
درويش أنا
درويش أنا جذبه هواكي لدنيتك
هايم في حضرة حضرتك
حباية دايرة ف سبحتك
وأنا ... ضحكتك
لو الحياة يوم بكتك
أنا العصاية اللي بتسند خطوتك
وأنا الأمان اللي بيُحضن رعشتك
وإنتي ...
إنتي الحياه
إنتي الصلاه
في حرم فؤادي المستكين
إنتي الرحيل جوه السنين
وإنتي الغُنا
إنتي البُنا
يعلى ويتحدى الفنا
يا حاضنة كل الولاد
إنتي العناد
وإنتي الجهاد
يوم الميعاد المنتظر
إنتي المكان وإنتي البشر
وإنتي الصُراخ وقت السُكات
إنتي الثبات
إنتي اللي آتِ واللي فات
والذكريات المؤلمة
يا ملهمة
إنتي العمى
وإنتي العيون
إنتي السكون
والمطحنة
وضهر جدى اللي إنحنى
من كُتر ما شال الحمول
ومشي في طريقك يبتغي
يوم الوصول
لجلن يطول
حلمك وحلمه وحلمنا
ويلمنا .. في ضلك بشر
بقلوب بشر
عارفة الأصول
نسقي سطورك بالحروف
ناقشین ملامحك و الكفوف
وبنبتغي زيه الوصول
مات الأصيل
والأصل باقي يا بهية عمرنا
طول ما احنا مالك أمرنا عقل وضمير
طول ما احنا مالك أمرنا عقل وضمير
مساحة إعلانية
مساحة إعلانية
