مساحة إعلانية
مساحة إعلانية
واقف بقدم رجل والتانية
بتخطي آخر خطوتين في العمر ..
لمحوني ناس واتشعبطوا فيا
نط السؤال: الانتحار ليه كفر ؟!..
كل العمم شهرت سيوفها قوام
واتحضروا علشان يجاوبوني
قبل انتحاري بفركة كعب حكيت:
في البدء كان الاعتذار واجب
للفلسفة والعلم والكراريس ..
للمسألة والحاجة والتدريس ..
للجنة قبل ما تتزرع تفاح
لجناح بعوضة عمره ما بيرتاح
للموت عشان بيريح الأرواح
ولشخص آدم ولدموع إبليس ..
الحنه جاية تعلمك يا عريس ..
وتحددك في الكَدْر دون الناس ..
شواكيش كتيره نازلة ع المسامير
والغلطة أصلا ع اللي يعمل راس ..
بسم الحقيقة المطلقة نفسك
والشكر كل الشكر للأزمات
كان فيه جدع نزل الحياة صدفة
مولود ف إيده كشف أحلامه ..
ملهوش سنان تمسك علي الفرصة
كل أما يحلم أهله يتلاموا ..
يضحك تزيده الدنيا 100 قرصة
يفرح يغطوا الفرح ويناموا ..
شغال بيدفع كل يوم بلصة
علشان يعدى الضرع قدامه ..
شمر دراعه وابتدا يمشي
حط الشاويش الأرض في كمامه ..
غشش جميع الفصل في الحصة
قفشوه بينجح كشروا وزاموا ..
ويسئلونك:
هو مات ازاي؟
قول خبوا منه في الغيوم بكرا ..
كل اما يسأل بكرة جاي إمتى
يتداروا منه ويحدفوا ذكرى ..
والقلب يصبر على الهموم ازاي
وازاي هيصبر ؟ " لمْ يُحَطْ خُبْرا " ..
الخضر شافه ع السفينة هناك
كسر السفينة وقال مفيش هجرة ..
- ازاي مقولتش قبل ما استناك ؟
= طب ليه أقول ! " لنْ تستطع صبرا " ..
- اعذرني طيب
= لأ .. مفيش اعذار
- طب سيبلي ليلة ولا نص نهار
= انا بعت بكره وسلموني جدار
وان روحت عنده ابقى اردم الحفرة ..
لم اللي فاضل يلا وانزل عوم
أصل السفينة لازملها عَمرة ..
مهمل ف روحه الكنز لسه هناك!
م الفرحة نط العمر م الشباك
بصله فينك كنت بستناك
فض القفولة طلعله كاس خمرة
فرعون شاورله خوف التعبان
بَكْشِف بطاقته لقيته م السحرة
يا أيها الجمع اللي مش فاهم
السلوى مرة وبندوقوها بمن
بيحب قال الفرصة أهي جاتني
لمحوها جاية بندقوها اتجن
مين اللي وزك ع الغرام يا غشيم
هو انت غاوي المرمطة والدن
حبيت وقاصد وجه رب كريم ؟!
طب هي نظرة !؟ .. قلبه ليه ادمن ؟!
كل اما يكشف صدره للضمة
يطلعله سهم يقوله أوعى تحن
يتسن ليه ويصيبه ف احبابه
طب ليه مكانش في وحدته بيتسن !؟
جواه شوارع بنت ألف سؤال
معرفش ليه الحظ مستحلف
بيعدى جنبه يعلن الترحال
لمحوه في مرة جاي متكتف
قام قاله (هِيَّ) والحنين قتال
دور بوشه وقاله متأسف
تقعدشي تكتب شعر متفلسف
وتقولشي ليه من دون صبايا الكون
الدنيا تُشكر لأجل بتسيبك
تلمحها قاعدة ف حضنه ف البلكون
وبلاش تقولي ظلم وابصر إيه
انت اللي عايز كل شيء بقانون
الواد يا عيني لم روحه وغاب
جارر في خيبة .. الصبر ليه لطه !؟
علي قبر ابوه بحتر شوال أشواق
ويقوله يابا الجرح مين حطه ؟!
مين اللي وزع في الكشوف أحلام ؟!
طب ليه في عز الحلم نتغطوا ؟!
فدان شطارة ولا متر حظوظ ؟!
عصفور في إيدي ولا اكون رابطه ؟!
أصد موج العمر وأعديه
ولا اللي أضمن احتمى بشطه ؟!
وقت الغرق أمسك قلوع الناس
طب ليه سابوني في مركبي ونطو ؟!
الكدب خيبه أكرهه وخلاص
طب ليه حقايق عمرنا اتمطو ؟!
لو فيه يا ابويا حل من عندك
إرميلي طرف الحل أو هاته
الجنة حلوة؟
فيها عدل هناك؟
طب فيه مكان للي الحنين فاته ؟
طبطب عليه الدمع قام عيط
بل بدموعه القبر ورُفاته
فسح بإيده وحط طوبه ونام
وفي حضن أبوه شد الكفن .. ماتوا .
مساحة إعلانية
مساحة إعلانية
