المبدعون

يَا سَلامْ ....!! قصيدة للشاعر درويش الأسيوطي

2024-04-14 01:37 AM -

الشاعر درويش الأسيوطي

يَا سَلامِ
لَوْ رِجِعْ بِيَنَا الزَّمَانْ ..!!
........
يَامَا نِفْسِيْ أ
لْقَى نِفْسِيْ ..
نَفْسِ نِفْسِيْ
والْمَكَانْ نَفْسِ الْمَكَانْ ..
والْهَوَا طَيَّابْ ..
وِ مِنْ فُوقْنَا السَّمَا مَبْدُورْحَمَامْ ....
يَا سَلامْ ...!!

يا سلام .. لَوْ النَّخِيلْ مَا هُوشْ طَوِيلْ..
والْبَلَح عَلَى كَدِّ إيدِيْ
والطَّرِيقْ لِلْبِيتْ ِضَلِيلْ
وعَ الْعَتَبْ سِتِّيْ وسِيدِيْ ..
قَلْبُهُم طِيرَه بْجَنَاحْ ..
وِعَ الشَّفَايِفْ الابْتِسَامْ
يا سلام
يَا سَلامْ
لَوْ رِجِعْنَا إصْغَيَّرينْ
والْقُلُوبْ جُوهْ خَلَقْنَا
مِنْ عَرَقْنَا رَوْيَانِينْ ..
والْحَلاوَةْ حِلْمِ حَالِيْ ..
فُوقْ غَصَاْيِةْ الْبَيَّاعِينْ
حَتَّى لَوْ كَانُو جُيُوبْنَا مَخْرُومِينْ ..
الْحَلا مِشْ بَسِّ مَلْفُوفُ عَ الْعَصَايَه
الْحَلا مَعْقُودْ فِ سُكَّرِ الْكَلامْ ..
يَا سَلامْ ..

يَا سَلامْلَمْ يَا بِنَيَّهْ فَرْخِ طَيرْ ..
دُولْ ضَفَايْرِكْ
يا بَدِيعْةِ الْحُسْنِ
وَالاَّ حَبْلِ مِ اللِّيفْ الْحَرِيرْ
حِلْوَه يَا سِتْ الصَّبَايَا الْخَمْرَانِينْ
دَبْدِبِي عَلَى دَرْبْ قَلْبِي ب
ِالْكِعَابْ مِتْشَقِّقِينْ ..
صَحِّي قَلْبِي م ِ الْغَفَا ..
كَفِّكْ الْمَرْعُوشْ دَفَا
يِمْلَى صدري بِالْوَنَسْ والانْسِجَامْ
يا سلام يا صَدْرِ بِنِّيِّةْ حَمَامْ
وْ يَا سَلامْ

أحْضُنِي يَا امَّايَه قَلْبِي م السَّقِيعْ ..
وِإطْرَحِي شَالِكْ عَلّيَّهْ
لا الْعَفَارِيتِ اللَّئِيمَه تِلْتَقِينِيْ
لا .. وَلا الرِّيحِ الْعَفِيَّهْ
فِ حُضْنِ أمِّي .. رُوحْ يَا هَمِّي ..
سيبني أَفْرِشْ فِ الْبَرَاحْ حِلْمِي وَ أنَامْ ..
يَا سَلامْ ...

أسيوط الجديدة – مارس 2024