المبدعون

نيجاتيف .. شعر .. عصام مهران

2024-04-20 10:33 PM -

الشاعر عصام مهران

بعد مايفوت الأوان
لاطعم أبدا للحنين
ولا السؤال
ولا الكلام
مُرة الحاجات ،المواقف
وأنت واقف مندهش
بتمر فى عنيك الصور
تسأل فى روحك ، الناس دى مين؟
كان إمتى رُوحنا وجيِّنا؟
الوقت كان زى الخريف
والزيف فى أحضان اللقا
كدب الكفوف فـ الطبطبة
قلبي كان إنسان ضعيف
بيستخبي دايما فى الفرح
من روحه يخبز فــ العجين
والنوايب جتته
يقطع ويدى المعزومين
ويلف يرقص وسطهم
زى العبيط ..
زى درويش الموالد
عمره ضاع فى الدروشة
لا طال يبقى الحسين
ولا حتى طال يبقى الولى
يا لمة الكدب الوفى
هو ده قلبى العفى؟
كان يشد الحيل يجيكم
كان يدق الدقة ليكم
يختار حبايبه ويصطفى
إخص ع الأيام وناسها
كان حكمة الناس الكبيرة
إن الغوازى للأفراح ونسها
متشدش إيدك فى الفرح
بص الشدايد ..مين معاك؟
بص القرايب ..مين هواه وافق هواك ؟
بص الحبايب .. مين دمعته سبقت بكاك ؟
يارب عجِّل بالمدد
أنا قلبي عارف سكته مهما بتخونه الطرق
نظرة منك للعليل
روحه ترمح فى السما
يرجع برىء
نظرة مدد سيدنا النبي
(المرء مش دايما خليل)
فكن خليلى وعزوتى
....
لِــمْ الصور ..
طُــل الوشوش!
كدابة لمة الفرح .
وشوش بتفضحها الصور