مساحة إعلانية
كان نفسى
أقدر استخبي
من السنين
وأفضل ف وسط
عيال حارتنا ولعبهم
عيل
بيحلم يبتدي
اليوم الجديد
علشان يلف الدنيا
طولها وعرضها
من غير حساب
من غير عتاب
من حد كان
عشمان في شئ
معملتهوش
من غير رتوش
بتسيب أثر
على وشي
من كتر التعب
والمسئوليه
والحمل التقيل
من غير ما اشيل
الهم فوق قلبي
اللي عجز من فراق
صاحبي اللي مات
من غير آهات
بتهزني توقع دموع
غرقت بيها كل ايد
بتشدني لبر النجاه
من غيرها ( ياااه)
لو بس يرجع عمري
بيا كام سنه
وأفضل في وسط
عيال حارتنا ولعبهم
من غير ما اشيب
*مبادرة "كل يوم شاعر" يعدها ويقدمها الشاعر حمدي حسين
مساحة إعلانية
