مساحة إعلانية
متوزعة بين الجهات الاربعة
و مفيش علامة ع الطريق
معرفش إيه بيودي فين البوصلة ضايعة
و الغيوم حاجبة السما
و حاسة بضيق
يا رب أنا حاسة بضيق
محتاجة منك معجزة
تنزل على قلبي بسلام
توهب لي مفاتيح الكلام
مثلا تجيني في المنام
منك إشارة
أو مرة تبعت لي بشارة
تجمع شتات روحي
اللي ياما اتوزعت
علشان تعود لي باليقين
فتعود بكومة أسئلة
أطلق طيوري الأربعة
و بكل لهفة انتظر
يأتوني سعيا
ما يجيني رد
إلا صدى صوتي الحزين
يارب أنا
جربت لك كل السكك
و اللي وصل لك ما هلك
و أنا خايفة أكون م الهالكين
أنا باستعيذ بمحبتك
من حجيم المنتصف
و من غيامة الاحتمال
و كتير باشوف الكون سؤال
كل ما أحاول أفسره
بيزيد غموض
أرجع و شايلة في جعبتي
نفس الردود
نفس المتاهة المظلمة
نفس الإجابات البليدة المبهمة
أرجع و شايلة في قلبي قيد
كل أما أحاول أكسره
ألقاه حديد
و أنا يادوب كائن ضعيف
بيمر ع الايام بسرعة
كأنه طيف
الوقت زاحف ناحيته
عقرب مخيف
أنا يادوب كائن ضعيف
يوم ما اتولد
وشموا على جلده الطري
تابوهات كتير
دقوا له في الهون النحاس
اسمع كلام أمك و أبوك
فتحوا له باب
و حذوره من ألف باب
فجأة لقى روحه في نفق
و أخر النفق مقفول
كائن جهول
راضع مع الخوف الفضول
كل أما يمشي في رحلته
تكبر و تتقل جعبته
و مفيش رجوع
و مفيش مفر
من الوصول
مساحة إعلانية
