مساحة إعلانية
الفنان علاء عبد الخالق كان له أغنية زمان بتقول: «تعدّي مواسم وفصول، وكل الورود بتزول». كنتُ دايمًا لما أسمعها أقول: لأ، مش كل الورود بتزول؛ في ورود بتفضل طول السنة، منهم الوردة الجميلة اللي اسمها «اللانتانا»، أو «صباح الخير»، أو «أم كلثوم». طبعًا محدش اهتم يعرف اسمها قبل كده… عارفين ليه؟
لأنها وردة غلبانة، شقيانة، وصبورة. بتتحمّل الشمس والحرّ والجفاف، لا عايزة رعاية ولا عايزة ضِل. تزرعها على رصيف تطلع، في قلب الشارع تطلع، في الجبل تطلع، في عزّ الشمس وعزّ البرد تطلع.
ورقها خِشن، زي إيدين الشقيانين، بس قلبها مليان نعومة وجمال وألوان دافية. الوردة بتفكرني بناسنا وأهلنا في أسوان؛ من برّه صلابة وخشونة وقوة، ومن جوّه دفا وحنية وطيبة.
إحنا زمان كنا زي الوردة دي؛ مزيج من ألوان مختلفة، كأنها قطعة فسيفساء رائعة. ألوان كتير، لكنها متجمّعة حوالين قلب واحد. نوبة، أصولية، عرب، جعافرة، أنصار، عبابدة، صعايدة… ألوان ولهجات، بس القلب واحد.
اللانتانا ما بتطلبش كتير؛ بتعيش على القليل، وتزهّر من غير ما تشتكي ، بالظبط زي أهلنا الطيبين اللي كانوا بيخلقوا الفرح من قلب الأحزان، وبيزرعوا البهجة حتى في الأرض البور .
هي مش وردة للزينة، هي وردة للحياة؛ فيها صبرنا، وجدعنتنا، وثباتنا، وفيها البساطة اللي بتخطف القلب.
ولو شوفتها في يوم، بصّ لها بعين جديدة؛ هتلاقي فيها وشّ جدتك، وإيد أبوك، وضحكة أمك، وجمال حبيبتك، وصبر الناس اللي الشمس صاحبتهم طول العمر.
مساحة إعلانية
