المبدعون

ماتتاخرش يامحمود .. شعر : محمد عبد القوى حسن

2024-09-03 01:01:59 -

الشاعر محمود مغربي

• كتبت في رثاء محمود مغربى عند رحيله عام 2015م

ودلوقتى
الصور طلعت
كما كانت
ومش موجود
صاحبنا تعود
وﻻ يمكن وانا قاعد
اقلب ف الصور وافوت
على كل السكك تانى
صديقى وقلبى متعبى
=ألم موجوع
ما يالا ياعبقوى نطلع
على الكورنيش
وبعديها على القهوه
ناخد حجرين
حجزنا ف قطر 12
ﻻبد توصل الدواوين
ترتب قعده ف المنيا
وتنشر قبلها اﻻخبار
عارفنى ياصاحبى
بعشق شغلك المظبوط
وبكره وبعد بكره نعود
هانحضر ﻻجتماع مع بعض
ونحضر حفلتك برضو
ونتعرف على اﻻصحاب
كتير ابواب فتحناها
كتير دواوين كتبناها
ومؤتمرات ف شرق وغرب
كتير والدرب كان لسه
فاتح احضانه للمشاوير
كتير لكن كده خلسه
يطير الطير
بدون تهليل
طيور بتعود ﻻعشاشها
وتفرد للمدى ريشها
تغنى ف عرس اعراسها
لكن طيرى بدون مواعيد
واول مره يعملها
يطير مايقولش
واول مره يعملها
ومايرجعش
وانا واقف على القهوه
ومستنيك
تيجى تحاسب على المشاريب
وانا ف اﻻمسبه الكبرى
بقولك اطلع انت ودير
وحنى قلوبنا باشعارك
وادهن جرحى باوتارك
تاخدنى ف القطر جارك
وتحكى ياصاحبى اسرارك
وسفريات .. مع قفشات
كتير حكايات وترتيبات
وتستقبلنى باﻻحضان
تشاورلى وانا افهم
توحهنى وانا اسمع
تنادينى انا موجود
وانا دلوقت باناديلك
بعلو الصوت
وارن عليك
وبكتبلك رسالتى اليك
تعالى ادينى مستنيك
ماتتاخرشى يامحمود