مساحة إعلانية
أنا كنت مفتون بالحقيقة
وغريبة باجمعها بدأب
من هرتلة مجنون حدفها، وهو ماشي في سكته
أو قالها في الليل الطويل
سكران في غيبوبة
.....................
من صغري مش باحلم بشيء
ولا جوا مني طموح عريض؛ أن أملك الدنيا
أو حتى بالأمل الكذوب؛
راح أقابل البنت اللي تقدر
تكسر التلج القديم؛ تصالحني ع الأيام
...................................
خمسين سنة
باطلق عصافير البراءة في سكة البومة
وانحت قصايدي المجرمة؛ من خوفي أواجه
ولأن برايا بوضوح.. كان فيلم رعب
حبست نفسي في نفسي؛ لجل اعرف أنام
...................................
أنا كنت حَسن النيَّة في حضور الذئاب
خدعت نفسي بأن ممكن انتصر
أو إن لسه في قلب يومي براح أجرَّب
أدخل الحرب اللي فرضتها الظروف
ولأني مؤمن بالهزيمة
رجعت لليل الطويل
الحي مني على السرير،
والباقي ع الحيطة
......................
العمر طال .. على عكس ما أتمنيت زمان
والوقت وراني بوضوح..
إن الحياة محنه
وان البشر أفخاخ
خفافيش بتستمتع بحيرتي، وروحي في الضلمة
ودراما أصعب من مجرد .. حيرة العابر سبيل
مين ضد مين في الحرب
مين جنب مين في الحزن
مين جرَّد الموت الجليل مسحة وقاره؟
...................................
ما اقدرش أورط حد في الليل والسقوط
أو أني أعلن..
تحت ضغط الأزمة بوضوح إني عشت
أو حتى بالغدر اللي فاق حد الخيال..
إني انطعنت
أنا مش ضحية حد غير نفسي
وصراحة بالصدق اعترف:
مفيش صحاب؛ لجل اتهمهم بالخيانة
...................................
نص
كان نفسي أقولك ألف سر
أو فصل فصلين؛ من تاريخ المهزلة
أو ربما البوح الأخير
بكلام بيوصف .. يعني أيه الأزمة
أو حتى عن سبب الغرق في الذكريات
و الوقفة على قبر اللي غابوا
في حين أنا الميت !!
*مبادرة " كل يوم شاعر" التي يعدها ويقدمها الشاعر حمدي حسين
مساحة إعلانية
