المبدعون

كان اسمه "محمود مغربي" شعر : سعيد شحاتة

2024-09-03 01:00:41 -

الشاعر محمود مغربي

• كتبت في رثاء محمود مغربى عند رحيله عام 2015م
الورد وردي
وضحكتي أصفي من اللبن الحليب
أنا كنت عايش وسطكم
....... زي القرنفل والندى والعندليب
قلبي ف حماكم
...سنبلات مبدوره في "البلد الغريب"
ومحبتي فنجان
........وقعدة صدقكم شاي بالحليب
الورد وردي
وضحككم صافي الروافد والمصبات والقلوب
والشعر أول كلمه طالعه بدون ذنوب
صادقين قوي
وأنا كنت صادق في المحبه كأنّي مش مطلوب
الحب يا أصحابي حلم جميل
اسطبل خيل مفتوح على وسعه
الحب رايه بتعدل المقلوب
وتحلّي وش القاهرة المعطوب
عيشوا كما عشت الحياه راضيين
ومسالمين
ومحنّيين الروح بعشق الأرض والوادي
هاديين كما كان "مغربي" هادي
عيشوا الحياه كما عشت متوضي
ماشي على صراطي المتين بأضحك وأنا معدّي
لا قلبي كاره حد أو محتدّ
ولا روحي شايله مزابل اللي اتهد
مبسوط كأن الدنيا كات عندي اختيار
فرحان كما الأبرار
ماشي بدواويني الكتار في الجنّة باتباهى
أمسيتي مفتوحه للمساكين
كوشه وملايكه وخلق ملياها
والشعر واقف جنبي جواها
أضحك له يسقيني
ألمس إيديه فيقوم يوضّيني
طبعًا فراق أصحابي على عيني
لكنّي فضّلت إني أروح وحدي
برضه ف حياتي اخترت اعيش وحدي
الوحده مش عيبه
العيبه إنك تبقى وسط الناس وحيد
عايش بتقرا لناس ماهيش سامعاك
بتحب ناس في الشدّه مش وياك
مخلص لناس رافضاك ومش سايباك
الوحده مش عيبه
العيبه إنك تعيش بتغني للتماثيل
....... مجبّر تحنّي الأرض زيّ النيل
زي الهديل في الهيش
زي اللي كاره روحه م التهميش
آسف يا أصحابي
آن الأوان أطلع لأحبابي
أفرد يميني وأفرّ في كتابي بهدوء
أرفض كراسي العالم الموبوء
آسف يا أصحابي
لما اتناديت من فوق ما أرغمونيش
أنا اللي اخترت أعيش في العالم التاني
أبعد وأسيب الأرض للجاني
أبعد وأنا مسامح بشر أو جان
والقلب مش طمعان ولا ساخط ولا زعلان
صدقني يا شاعر
................. محمود هناك فرحان
مبسوط لأني ف حضرة الأحباب
مبسوط لأن لقيت لروحي كتاب
وكتابي ف يميني
ومعايا قلبي وروح محبّيني
ماشي ف حمى الشعرا بدواويني
آسف يا أصحابي
سيبوا ابتسامتي ف وسطكم نعناع
واتعلقوا في القاع ببعض
الموت ما بيهزّش
بس اللي يكسر لو نخون الوعد
آسف يا أصحابي
أنا في الجنه بأقرا لأهلها أشعار
أنا في الجنه مرّيت ع الصراط واجتزت آخر اختبار
والاختيار الصعب دا كان مطلبي
فما تحزنوش ع الأرض
......... وادعولي إني أشوف سيدنا النبي
وان طفل شاف صورتي وسأل ما تدمعوش
وقولوله عدّى من هنا
......... وقولوله كان بيحبّنا
............ وقولوله كان شاعر صبي
وقولوله كانت شهرته ع الأرض
..................... "محمود مغربي"