مساحة إعلانية
مساحة إعلانية
ندّاهـــة قمر
جناح الطّير ف الرفرفه ..
ذكرى قديمة لطفل صغيّر
مقلّم ضوافر الحُزن ف قلبه
بشويّتين أحلام
وشويّة سعادة
وبخاف م الحب لو جاني ..
بنظرة من شبّاك بعيد
وضحكة من عالم تاني
اصاحب الشبابيك
والبلكونات
والجناين
والشّجر
وتاخدني ندّاهة قمر
ودوّامة السّنين
وبدال ما يزيدوا الحبايب واحد
يقلّوا الطيّبين ..
..........
معمّر صوابعه
أنا بعترف ..
بالغُربة اللي ف غيابك
خلّتني طول الليل بفكّر ..
قد إيه م الوقت فاضل ..
لابتزاز أحلامي تهجر,
والوجع يفضل يشاور ..
على قلبي ومعمّر صوابعه ,
والغُنا صوت العديد
أنا بعترف ..
كان سهل جدًّا
يختلف كل اللي حاصل
ومااسبش باب ف القلب وارب ..
لعنيكِ
وعصابة م المطاريد
.........
أوان العشـق
ولسه ..
كل ماتعدي تتبسم وترمي سلام
تترسب جوايا الفرحه
يتسرسب من عيني الحزن
أتمدد واسرح ف عنيها
وانا ببلع ريقي بالعافيه
عيون دافيه
تغازل / تنازل
وتهزم ماترحم
وأنا المهيأ للغرام
قدام عنيها المرهفه
واقف صفا
يتحزم برتقان القلب م الدهشه
أقول لسه ..
أوان العشق
........
أوّل وتاني وتالت
عن بنت لمّا بتسكنك ..
نسمة هوا ..
بترد فيك الرّوح
وبنت لمّا بتحضنك ..
زي الدّوا ..
تلقى الوجع بيروح ..
أوّل
وتاني
وتالت
عن بنت لو قالت ..
بحبّك ..
قوانين الفيزيا بتتغيّر
والنّور يعدّي ف عروق الجبس ..
يفتح ممالِك
........
بالكشّـاف
غمّضت عيني
وقلت اشوف ف الحلم ..
اللي انا مش شايفه
شفت كتير
الحلم صاحب وفي
بس فقير
فتّحت عيني
خُفت أكتر
كان نقش سقف السّما
مشاوير
هم البشر ع الأرض
والليل بيكبر ..
جوه شاشة العرض
بس ضرير
ع الحلم واقف
بيغني ..
ع العزف ف التكسير
..........
فركة قـــــدم
لما السنين الشابه
تعشق عجوز الحلم
ف عنيك ..
يرحل تاريخ ابتسامتك ف العدم
فركة قدم
بينك وبين المنتهي
مع إنها ..
ضحكة عنيك الصبايا قمر
غرقان ف كاس الضي
ع الآخر
ومالوش آخر
غناه البحر ف ضلوعي
ومادمت ف سكتي وطوعي
احلم قوي
وماتفكرش كتير ..
ف سنينك الشابه
لو عشقت عجوز الحلم
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
