مساحة إعلانية
في الليل
و أنا وحدي
و الدنيا سكون
و الشارع هس
بتجيني هلاوس
و وساوس
و يصيني المس
أفتح ابواب مقفولة
ممنوع يدخلها الإنس
واشوف الجنة قصادي في كفة
و أشوف النار في الكفة التانية
و علامة استفهام في النص
و مفيش إجابات
و إن جات
بتكون محفوظة
و انا أصلا طول عمري بليدة
في مواضيع الحفظ
و باخاف من أي مدرس
يطلب مني أحفظ صم
أتغم و أتعلم إني أغش
من صاحبي القاعد جانبي
اللي كمان بيغش
من صاحبه القاعد جانبه
و تدور الدايرة
لحد ما توصل أخر واحد فينا
إتعلم يحفظ و ما يسألش
و لا عمره في مرة
خرج ع النص
في الليل و انا وحدي
و الدنيا سكون
و الشارع هس
أبص برهبة
في سقف الأوضة
و يتهيألي
إن الريح الباردة هبت فجأة
و سحبت روحي لحتة بعيدة
و اسمعها تنادي و تقول
يابليدة !!
دوري جواكي على الإجابات
و يادوبك لسه هافكر
أسمع صرخات
بتحذر فيا و تقول يا غبية
الغول الواقف أخر السور
مستني عشان ياكل راسك
فأخاف و أكش
و أشد الغطا فوق راسي و أنام
يدخل لي شيطاني في الأحلام
و يوسوس لي
من فين جيتي ؟
* من بطن امي
على فين رايحة ؟
* على بطن الارض
جسمك فاني و هياكله الدود ؟
* انا زي نبات الأرض بعيش و بموت
روحك فانية ؟
* لا قطعا ليا حياة تانية
مين فين قطعا ؟
إنسية غبية ما بتفكرش
* ملعون إخرس
* أخرج من راسي و سيبني أنام
- أنا عارف إنك كارهاني
مع إنك رامية عليا كل ذنوبك
و تمللي تسبي و تلعني فيا
* وسواس خناس
* أعوذ برب الناس منك
_ الناس من طين
و الطين بيعيد تكوينه النار
و أنا قصدي أعيد تكوينك
* يلعن دينك مجرم مغرور متمرد عاصي أخرج من راسي
انا لسه مكمل دوري لأخر مشهد
أنا بطل القصة اللي ما كملتش
أنا أول واحد ما استسلمش
أنا اول واحد يغرس بذرة شجرة لأ
اللي بثمرتها نبتت قصة هذا الخلق
من غيري مفيش لوجودكم عذر
من غيري مفيش أحداث
و لا عقدة و حل
و لا خير و لا شر
انا واضح جدا للجمهور
مش لابس وش
مع إن كتير منكم
عايشين في الدنيا
بمليون وش ...
أتعوذ منه بٱية الكرسي
و سورة الناس
و تمر الليلة ما بين أضغاث
أحلام و وساوس
و ليلاتي تدور الحرب ما بيني
و بينه سجال
و الحرب ما بيني
و بين نفسي الأمارة
بألف سؤال
و الحرب اليومية التافهة
ما بيني و بين الدنيا
و في الغالب برجع مهزومة
أحيانا تهزمني إجابة
و أحيانا يهزمني سؤال .
مساحة إعلانية
