مساحة إعلانية
باقوم م النوم
على خضارك وطول اليوم
أنا فى دارك تفرجّني
على كونك
أروح ويّاك
عشان كونك
ف قلبي
وروحي وعنّيا
بتسقي عروقي حنّيه
وتفتح لي
دواليب السّما نورها
تعلقني ف حبال سورها
أشوف الأرض والفلاح
بيبُدرها
واشوف
فلاحة طرّاحه
بتفاحتين
على خدودها
على كتافها
ولد نعسان بيتمرجّح
بخطوتِها
ويصحى
يقول لها
آمه..
ينام تاني
على الضمّه
على راسها
مشنة عيش
عودين جرجير
وجبنه قريش
وتُقعد تفِرش المنديل
وحنيّة لبنها
تسيل
ف تزرع صدرها
ف حلقُه
تخاف يصحّى يديق خلُقهُ
تحاجى عليه بطرحتها
وتدعي له
بحُرقتها
وتنده أبوه
بصوت عالي وتضحك لُه
يهون قسوة
شقا صبرُه
ولمّا يقعدوا
ياكلوا
عصافير الغيطان تحلم
تعشي عيالها
من جوفها
وتعلا بُسرعه
لو قرّب
أبو قردان
يخوّفها
وهو وهيّا
يتسامروا
ويفتكروا
كلام الليل
وحنّية
إيدين الليل
على كومة
عياااال
نااااموا .
*مبادرة "كل يوم شاعر" التى يعدها ويقدمها الشاعر حمدي حسين
مساحة إعلانية
