مساحة إعلانية
مساحة إعلانية
أقول لك عطري مشتاق لك
وريحته عليَّ تنده لك
تعالى الورد أقطف لك
يرد يقول لي دي سهلة
...
أقول نتلاقى وسط نهار
نروح سيما ما قلتش بار
يا ريت تقبل بلا أعذار
يرد يقول لي دي سهلة
...
أقول ابعت لي تصويرة
يا شيخ.. صدقة وتصبيرة
لا اعاند وابقى شريرة
يرد يقول لي دي سهلة
...
أقول عايزاك في سهراية
عيونك فيها شمعاية
وقلبي ليها غنواية
يرد يقول لي دي سهلة
...
أقول نخرج ونتمشَّى
يمين الله ما هاتعشى
وقول.. إيه تاني راح تخشى؟
يرد يقول لي دي سهلة
...
أقول عازماك هنا معايا
نجاحك حفل دنيايا
وكاس تتقاسمه ويايا
يرد يقول لي دي سهلة
...
أقول له اكتبني تعويذة
ما فيش إنسية ليها ميزة
واكون لك غالية وعزيزة
يرد يقول لي دي سهلة
...
واقول له اهديني كلماية
تفرَّح بيها دنيايا
(باحِبِك) قولها.. دي حكاية؟
يرد يقول لي دي سهلة
...
و(سهلة) دي كلمة ما بتكفيش
وسكرها ما بيحلِّيش
ولا يخلِّي فؤادي يعيش
وإوعى تقول لي دي سهلة
...
وكان لك عندي كام مُهلة
ما فيش ولا حاجة مستاهلة
يضيع م العمر لو وهلة
باقول لك غور.. ودي السهلة
بدل ما ابني أمل كداب
وأستنى.. وألقى سراب
والاقي القلب مني داب
وفي مرايتي أكون كهلة
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
