مساحة إعلانية
مساحة إعلانية
من مُدَّة عدَّى طير غريب
قال يا بشر
فيه كلب فوق سطح الهرم
إيه المنتظر
الدنيا قامت ع الخبر
وبسرعة البرق انتشر
والأسئلة زى المطر
نزلت تبعتر في الأثر
ازاى طلع
وازاى وَصل
وازاى هاينزل
أو هاينجى من الخطر
ازاى حسبها بدون حساب
مين علمه فن الصعود من غير كتاب
كان أصله إيه الكلب ده من دي الكلاب
رد الهرم لاكبر وقال:
احنا اللي علمنا الكلاب ازاى تناطح
للسحاب
قام المزاد
من ألف للمليون وزاد
والأسئلة زى المطر
فضلت تهاتي بالخبر
طمعانه توصل للأثر
رغم الجواب المختصر
مع إنها شايفة الهمم
شايفة الوطن لما انتصر
شايفة الشجر
والناى زمانه ما انكسر
والطير جبينه ما انحنى مهما حصل
شايفة العقول النادرة
والمعجزات المنجزات الساهرة
أحلامها وصلت للقمر
شايفة الموالد والموائد والقلوب العامرة
شايفة اللي كانت مِهنتُه
تجني ثمار الموهبة
والنيل هبة
من يومه ساق المركبة
من يومه زيّن توب حبيبته الطيبة
قلبه المدد
خلى الحبيبة عشقته
خلاها ضلة لْجَنِّته
في الشدة هزت نخلته
خلاها شمس مسلِّته
خلاها تبقى لدنيته بردية صانت عشرته
قلبه المدد
فيه الدوا والطبطبة
عاش للملاجئ والغلابة لقمة طاهرة ومَرْتَبة
عاش للحكاوي والغناوي مصطبة
عاش بير يصون الفضفضة
قلبه المدد زى الندا
محفوظ بأنوار الهدى
عاش للفدا
كاره ألاعيب العدا
عاش بالرضا
عطَّر مقام السيدة
مصر التي تحمل تراب الأنبيا والأوليا
أصغر ما فيها كان ملك
أصغر ما فيها ملهِمِك
كل اللي عدى من هنا
يا دنيا قلبه يأمنك
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
