مساحة إعلانية
مساحة إعلانية
قول يا طيري
يعني إيه ضل الحبايب
ينسى أجمل ذكريات
يعني إيه غنوة قمرنا بَلَّة ريقها باللي فات
ليه محبة بحجم دنيانا الكبيرة
شوقها يتحول رماد
والربيع تدبل وروده
والعبير يصبح آهات
قول يا طيري
ليه المشاعر تنتهي وتهون علينا
والحياة أجمل ما فيها
في انعكاس نظرة عنينا
وان تركنا الأرض تفضَى من حواديت الوداد
يبقى فاضل إيه ف حياتنا
والهوى مقلوب علينا
الهوى أجمل ما فيه
لما نغضب ويراضينا
لما نتعب ويداوينا
واما بهمومنا نبات
نبض قلبه يحتوينا
الهوى أجمل ما فيه
إنه طاير فوق سحاب
حتى مهما يكون بعيد
يبقى حاضر في الغياب
حلمه مفتاح السعادة والسماحة لكل باب
حتى ريحة الحب تفضل
وسط أوراق الكتاب
الهوى إحساس كبير
يرسم العصفور .. يطير
يرسم الخطوة .. تسير
كل شيء في عيونه قاد
والخيال في إيديه حرير
الهوى لعبة لقانا لما كنا صغيَّرين
كنا قد الكف نصنع
حلم خَضرة وبيت بطين
العريس جنب العروسة
والحياة سكر نبات
والليالي مهما تاهت
روحنا عايشه للحنين
الهوى مرسال محبة
طار على سطوح الجيران
هو إحساس المودة
وسط شلة من القرنفل والبنفسج والريحان
أم باعت يوم دهبها
لاجل فرحة للولاد
أب مالي قلوب ولاده بالسماحة والأمان
الهوى طبع النخيل
نجم عدى المستحيل
حكمة للنيل الأصيل
قالها مرة ف ليل طويل
كل شيء له أصل ثابت
مهما حمل نهاره زاد
عُمْر ما فروعه تميل
مساحة إعلانية
مساحة إعلانية
