مساحة إعلانية
تسيب و أنا أسيب ؟
أنا موافقة !
بتستغرب هاسيب لك إيه ؟
و إيه ويايا أفاوضك بيه
شايفني من بعيد نملة
بتسعى وسط كومة نمل
بتدخل شق مضطرة
و تخرج منه مضطرة
و خط العمر كله شقوق
دا شق بلعني
يوم ما الداية سحبتني
بايدين باردة
في ليل بارد
و شق غويط
سحب روحي لبير ضلمة
و قدر غامض
و شق طويل مالوش أخر
جبرني أعيش في جوع كافر
دا جوع حسي
و جوع نفسي
و ما أكتر جواعى الروح
اذا وقفوا في طابور
أطول من الأيام
عشان بيبيعوا فيه أحلام
على النوتة
و أستني بأمل
يجي عليا الدور
مجاش الدور
و لا مل الأمل مني
و لا مليت من الوقفة
تسيب و أنا أسيب
أنا عارفة انه بالمنطق
مفيش صفقة
ما بين حاكم و بين محكوم
باحاول اكسر القاعدة
و هاخسر أيه
ما عنديش حاجة اخسرها
و لا عندي اللي افاوض بيه
غير صوتي اللي أحيانا
يدوب يوصل لسقف البيت
و يرجع لي أنين مكتوم
أقولك ايه ...
كتير بالقاني من غير صوت
خرس يشبه أوي للموت
..
تسيب و انا اسيب ؟
هاسيب لك صرة الأحلام
عبي و شيل و ما تخليش
لا حلم كبير و لا صغير
لا قلب سليم و لا مكسر
و سيبني مرة أتهور
و أحط في قهوتي سكر
شبعت مرار
هاسيب لك كل تحويشتي
و سيب لي يومين
أعيش فيهم بحرية
أحب بكل ما فيا
تفك الخنقة دي شوية
و نعمل هدنة أنا و انت
ياعم انت
إيديك الإتنين على رقبتي
نفس لله ..
مساحة إعلانية
