مساحة إعلانية
إهداء إلى صديقي المهموم دائماً بوطنه
الشاعر / أمين عثمان
يا أمين
يا اللى قلبك ع الوطن
بيبات حزينْ
يا اللى دمعكْ
نهره جارى
بالألم ويَّا الأنينْ
يوم تبات مهموم فى يافا
وتبكى أقصى
أو جنينْ
يوم تنادى ف بر دجلة ْ
ع العراق يا مؤمنين ْ
و أما تتعب
بلقى نبضك جاى يصلى
فى الحسين ْ
تنده الأزهر يلبى
والجميع بيقول : أمينْ
من زمان
من يوم ما شوفتكْ
كنت زايد حبتين
كنت خاسس حبتين
ترمومتر لحال بلدنا
أم ضحكة
ع الجبين ْ
أم قلب كبير موافى
ع الجميع بيقول عوافى
كلنا ف عيشة تصافى
الجرس ويا الآدان
مصر دايماً
فوق ورقتك
عايشه ف همومك
رشاقتكْ
بلتقيها فارده إيدها
والأمل مفروش حنانْ
كل شعرك نبض ليها
يمسح الدمعة ف عينيها
ويواسيها
ع اللى كانْ
واللى جاى
دايماً فى بالكْ
يفرش البسمه ف محالكْ
حتى لو طال الزمان ْ
حتى لو
طال
الزمانْ
*
16/ 2 / 2007
مساحة إعلانية
