مساحة إعلانية
عمال بتدور فى الألوان
على لون كان يشبه لونك
مش قادر توصل أي مكان
تايه بين حلمك وظنونك
بتخبى الضعف بضحكة زور
وتقول للناس انك راضى
والروح من جوة تلف تدور
فى طريق مسدود وكمان فاضى
بتمد ف إيدك تمسك خيط
تلقاه بيدوب جوة كفوفك
واقف مسنود على أقرب حيط
والعتمة بتكشف عن خوفك
الساعة بتسرق فى الأيام
والعمر بيجرى وبيسيبك
بتنام وتصاحبك الأوهام
وبتصحى ما تلاقى حبيبك
الناس شايفاك هادى وراسي
بتمشى وتضحك فى الزحمة
من جوة بتصرخ وتقاسي
والدنيا معاك فاقدة الرحمة
الريشة بتجرح فى اللوحة
والقلب بيصرخ من الحرمان
احلامك دايما مدبوحة
وبتنزف مش لاقيه مكان
الصمت بياكل فى كلامك
والكلمة تطفى فى قناديلك
موجوع من قسوة أيامك
ومفيش ولا دمعة بتحكيلك
عمال بتعاند وتكابر
والماضى محفور جوة وريدك
من بره تبان إنك قادر
ومفيش ولا حاجة كانت بايدك
وبترجع تسأل ع الألوان
وتدور تانى فى حكاياتك
تايه وبتدفع فى الأتمان
والحزن متبت فى حياتك
وتدور على لون يشبه لونك
تلقى الأيام كات بتخونك
مساحة إعلانية
