مساحة إعلانية
تعرف تموت ؟
مش سهلة خالص أصلها دى تدريبات
الموت مهواش هوب...مات
دى استعدادات... صبر ودموع وعطش وجوع
سرعة رجوع القلب لو أخطأ وفات
أرض الرضا ..لازم تدوق الشمس وتحش الملامح من جدور المغريات
الموت لذيذ
تغيير حياة بس المهم تلم له حسنات
فانا بانصحك حاول تموت
واقطع حبال الأمنيات
المال صحيح زينة وهنا
أما البنون أساسات تشيل العنعنة
جدك وجده لحد آدم إسم أو طبع وصفات
..سيرتك هتطول كام سنة
لكن ضرورى هتنقطع ...وتدوب فى كباية سكات
يعنى المهم الباقيات الصالحات
عاوز تموت ..الموت بسيط
انزل محيط المصطفي ...
.اصطاد من الإخلاص وفا
والغيظ يابخته من عفا
وابنى علي الأساسات إيمان
واحسن لآخر طوبة ف حيطان الجيران
وحاجات كتير ..هننخ لو هنعدها
والوقت هيضيق ع الكلام. وثقافتى مش هتجيب لغاية عندها.. بالاختصار
الموت طريقك للبقاء
والعمر أصله قنطرة.... فإلي اللقاء
مساحة إعلانية
