مساحة إعلانية
ادكو مش مجرد بلد ع الخريطة
دى حتة جوة القلب ساكنة وغويطة
ريحة بحرها لما تدخل جوة الروح
تحس إنك رجعت لأصلك
وان الدنيا مهما لفت بيك
فيه مكان لسه شايل اسمك
...
ادكو دى كرامة فى هيئة ناس
فيها الوفا مش محتاج مقياس
الجدعنة فيها تاريخ قديم
متوارث من ساس للراس
....
ادكو يا وش الخير بيبان
تهدى القلوب تلين الاحزان
كانك آية طمأنينة
ماشية ع الارض فى صورة مكان
.....
منك اتعلمنا الثبات
وان الشدايد مهما تبات
فيه صبح جاى من صبر ناس
ما تعرفش غير المعجزات
....
يا ادكو يا وعد ما يخيب
يا غنوة صافية فى قلب المغيب
يا بلد مهما العمر جار
يفضل هواكى اقرب قريب
.....
ادكو كرامة فى هيئة مكان
وأصل ما يتهزش مهما كان
واللى اتربى فى خير ناسها
يعرف يعنى ايه عزة وإيمان
.....
ادكو يا لؤلؤة البحر
يا ستر ناس فى عسر ويسر
يا اسم لما ييجى ببالى
احس قلبى اتغطى بفخر
.....
فى ادكو تلقى الصبر حى
ما متش يوم ولا انطوى
شايلة الوشوش بهدوءها
زى النخل واقف ولا مرة انحنى
....
يا ادكو يا ضحكة فى السماء
يا دعوة ام وقت الرجاء
يا بسمة طالعة من قلب ناس
قلوب ما تعرف غير النقاء
....
فيها الشوارع تحفظ خطاك
وتغسل همومك وتمشى وراك
فيها الطويبة مش مجرد مكان
ده حضن دافى وستر وأمان
فيه الوجوه طيبة زى النسيم
وفيه المحبة عايشة زمان
حى الطويبة ده حضن البيوت
وصوت الأمان فى قلب السكوت
لو مال عليك يوم حمل الزمان
تلقى الضهر سابق اى صوت
......
فى شارع البحر سر وجمال
ريحته حنين صور وخيال
كأن البحر فاتح دراعه
يحضن مدينة وقلب ورجال
.....
شارع الجمهورية يا نبض البلد
يا صحو الصباح ...وعزم الجلد
فيه الملامح بتحمل شقا
وحركة وروح وقلب اتولد
....
فى سعد زغلول تلقى الوقار
ماشى على مهله بكل افتخار
كانه الشيخ وكبير المدينة
شايل تاريخها وهو المسار
هناك الرصيف حافظ خطاوينا
والضل فاكر كل ليالينا
وكل ضحكة ليها صدى
عدت هنا وعاشت فينا
....
أنا من ادكو وده انتماء
وفخر وعزة وطيبة ونقاء
جذرى هنا ماسك اصل التاريخ
وراسي هناك لأعلى سماء
......
مش كل بلد تسكن فيك
ولا كل مكان يحتويك
بس ادكو لو تلمس روحك
تعرف يعنى ايه مكان بيداويك
مساحة إعلانية
