مساحة إعلانية
أنا مش أم
شعور عادي
لا زعلانة و لا باهتم
و لا فارقة أكون عمة و لا خالة
أنا وحدي كدا حالة
في قلبي كون بحاله يعيش
و شكرا للي هنوني
و بعتوا لي قلوب جاهزة
أنا والله مش عايزة
و عادي الحياة ماشية
و لسه قادرة أشوف بكرة
و لسه قادرة أحب و أعيش
و شكرا للي لم يسأل
و لم يهتم
و شكرا للي سماني مجازا أم
أنا عارفة إن أنا مش أم
شعور عادي ما بوجعنيش
حبايب قلبي أشكركم
أنا مش عايزة أتعبكم
و لا فكرت أعاتبكم
و لا محتاجة تهانيكم
و لا باقات ورود ع الفيس
و لو لازم تهنوني
تعالوا في مرة و زورني
و بصوا بجد في عيوني
و لو شفتوني محتاجة لهداياكم
متعرفونيش
اقولكو سر ؟
و لا بلاش
عشان ياما كتير أسرار
تويناها في وسط الهيش
و ياما في الجراب أكاذيب
رعيناها و كبرناها بمزاجنا
و وزعناها ع الأحباب
و ع الأغراب
عشان أقدر بجد أعيش
عشان نصل الحقيقة المرة
لو صابني ما يقتلنيش
كدا تبقى الحياة حلوة
و بنت حلال
أنا عايشة و عال العال
يوماتي أبص في مرايتي
صباح الفل و الياسمين
على عيوني
صباح الضي على روحي
صباحي حنان
حنان دي صاحبتي و بنتي
و أمي و عمتي و خالتي
و كل الناس
أفسحها و أدلعها
و أعزمها عزومة تليق على روحها
اللي ياما وزعت منها على الأحباب
و طول ما الصحة موفورة
و عال العال
و كارت الفيزا ويايا
بقسط منه للأحلام
أكيد الدنيا لسه بخير .
مساحة إعلانية
